Sipas një studimi të botuar sot, akullnajat zvicerane kanë humbur 10 për qind të vëllimit të tyre në dy vitet e fundit, të njëjtën sasi si midis viteve 1960 dhe 1990. Shkrirja e akullnajave është pasojë e kushteve ekstreme të motit të përkeqësuara nga ndryshimet klimatike.
Pak borë në dimër dhe temperatura shumë të larta në verë morën 10 për qind të vëllimit të akullnajës gjatë viteve 2022 dhe 2023, zbuloi një ekip ekspertësh që studionin kriosferën në Akademinë Zvicerane të Shkencave të Natyrës.
Përfundimi i tyre është i qartë: akullnajat e Zvicrës po shkrihen gjithnjë e më shpejt.
Pas humbjes së gjashtë për qind të vëllimit të tij në vitin 2022, i cili pa shkrirjen më të madhe deri më sot, këtë vit vëllimi i akullit është ulur me katër për qind të tjera.
Kjo është rënia e dytë më e madhe që nga fillimi i matjes.
Shkrirja e akullnajave ka prekur të gjithë territorin e Zvicrës, e cila konsiderohet si kulla ujore e Evropës me 1400 akullnaja që ‘ushqejnë’ liqene dhe lumenj të shumtë.
