Ndërron jetë në moshën 80 vjeçare At Arthur Liolin, një figurë e shquar e Kishës Orthodokse dhe komunitetit shqiptaro-amerikan.
Lajmi është bërë me dije nga Mitropolia e Korçës përmes një postimi në rrjete sociale.
“FJETI MË ZOTIN ATË ARTHUR LIOLIN
Me hidhërim të thellë morëm lajmin e fjetjes në Zotin të Atë Arthur Liolinit. Një humbje e madhe për familjen e tij, Kryepeshkopatën Orthodhokse Shqiptare në Amerikë si dhe për të gjithë komunitetin shqiptar në Amerikë. Mitropolia e Shenjtë e Korçës i shpreh ngushëllimet e sinqerta familjes së tij dhe lutemi që Perëndia t’ju japë atyre forcë dhe shpirtin e tij ta prehë në tendat e të drejtëve. I përjetshëm kujtimi!“, thuhet në reagim.
Për ndarjen e tij nga jeta ka reaguar edhe ish ambasadori shqiptar në Britani, Mal Berisha, i cili shkruan: “In memoriam! Sot kombi shqiptar ka humbur një ndër korifejtë e patriotizmēs shqiptare. At Arthur Liolin! Rast in Peace! Një kujtim i paharrueshēm në Kishën e Shën Gjergjit në Boston, me At Arturin.”
Arthur Liolin lindi në New York në vitin 1943 nga prindër shqiptare me prejardhje nga Boboshtica e Korçës. Së fundmi ishte kancelar i Kryepeshkopatës Ortodokse Shqiptare me qendër në Boston dhe vlerësohej si një pasardhës i denjë i Fan Nolit, themeluesit të kësaj kishe.
Ai ka shkruar një sërë artikujsh rreth çështjes shqiptare në gazetën “Dielli,” dhe nëpër revista te ndryshme si “Liria”, Illyria”, “Koha Jonë” etj. Në vitin 1970 u dorëzua në gradën priftërore në Boston ku i ka shërbyer bashkësisë shqiptaro-amerikane.
Ai ka organizuar Bibliotekën e Fan Nolit, pranë Katedrales së Shën Gjergjit në Boston. Në vitin 1975 u emërua Kancelar i Peshkopatës Ortodokse Shqiptare të Amerikës. Në vitin 1991 Atë Liolion bëri udhëtimin më të famshëm të jetës së tij, ku meshoi në 22 qytete të Shqipërisë.
