Ditën e sotme të gjitha universitetet hapin dyert për studentët, të cilët nisin vitin e ri akademik 2023-2024.
Ministrja e re e Arsimit, Ogerta Manastirliu, iu ka përcjellë atyre një mesazh nëpërmjet rrjeteve sociale.
“Sot nis një kapitull i ri në jetën e mbi 121 mijë studentëve, që ulen për herë të parë në auditore dhe që vijojnë studimet në universitet tona, – tha Manastirliu. – Përkushtohuni me energji e kuriozitet, jepni më të mirën nga vetja, për të pasur një të nesërme të ndritur, siç ne të gjithë, si prindër, si pedagogë, dëshirojmë për ju!”
Por, pritet që sot studentë të Fakultetit të Mjekësisë të nisin dhe një bojkot të vitit akademik në vazhdën e protestës së tyre kundër ligjit që i detyron të qëndrojnë në Shqipëri për të shërbyer 5 vjet pas përfundimit të studimeve ose në të kundër, për t’i shlyer shtetit një gjobë prej mbi 5 mijë eurosh.\
Ja çfarë thuhet në njoftimin e Lëvizjes për Universitetin:
“Sot në orën 12:00, Lëvizja Për Universitetin do të mbajë një komunikatë te Ministria e Arsimit. Përveçse do të jemi te protesta e Mjekësisë që në mëngjes një grup nga ne, gjithashtu do të mbajmë edhe komunikatën me kërkesat dhe problematikat që e gjejnë studentët universitetin edhe këte vit të ri akademik.”
