Sipas burimeve zyrtare të Prokurorisë së Elbasanit i penduari i drejtësisë Artan Tafani ka arritur të zbardhë atentatin që po planifikohej ndaj njerëzve të drejtësisë, konkretisht ndaj prokurores së SPAK, Doloreza Musabelli, një prokurori të Lushnjes dhe ndaj një avokateje.
Tafani, pjesë e bandës së Laert Haxhiut ka deklaruar se po thurej plani për ‘të hequr qafe’ Musabelliun si dhe prokurorin e Lushnjës Adriatik Doga dhe avokaten Merita Selimi.
Ai ka deklaruar se i kanë ndjekur duke mbajtur nën vëzhgim edhe familjet e tyre. Laertit iu fiksua ta vriste prokuroren dhe I kanë bërë foto asaj, burrit avokat dhe fëmijëve. Tafani shton se Laerti kishte thënë se fotot e fëmijëve duhet më parë t’ia nisnin burrit të prokurores për të parë se çfarë ndikimi dhe reagimi do sillte. Pjesë nga nga dëshmia e tij:
“I kemi ndjekur. Laerti ka dashur të sulmojë Doloreza Musabelli, pasi ishte prokurorja e çështjes së tij në SPAK. Kjo prokurore kishte dënuar me burgim të përjetshëm shokun e Laertit Orgest Bilbilin dhe Anterio Kaloshin. I kemi mbajtur nën vëzhgim dhe familjet e tyre. Laerti, pretendonte se nuk kishte lidhje me ngjarjen dhe se kjo prokurore po i bënte gropën. Atij ju fiksua që ta vriste prokuroren ose ndonjë njeri të afërm të familjes.
I kemi bërë foto prokurores, burrit avokat dhe fëmijëve. Laerti tha se fotot e fëmijëve duhet më parë t’ia nisnim burrit të prokurores për të parë se çfarë ndikimi dhe reagimi do sillte.”
Ndërkohë pas dëshmisë së tij, mbrëmjen e kaluar janë kërkuar masa shtesë për mbrojtjen e prokurores Musabelli dhe pritet reagim nga Këshilli i Lartë i Prokurorisë.
Selimi ishte prokurorja që hetoi Laert Haxhiun, Orgest Bilbilin dhe Anterio Kaloshin për masakrën e vitit 2017 në Lushnjë, ku mbeti i vrarë Zamir Latifi dhe Jurgen Hoxha, ndërsa u plagosën Bujar Turku dhe Marjus Xhepexhiu.
Pas dy viteve hetime, Selimi shpalli moskompetencën duke sjellë dosjen ndaj tre të pandehurve në SPAK. Prokurorja e Lushnjës në muajin Korrik 2023 u shkarkua nga Komisioni i Pavarur i Kualifikimit (Vetting).
