TIRANË– Mediat greke kanë nxjerrë detaje të reja në lidhje me vrasjen e dy shqiptarëve në Athinë mbrëmjen e djeshme, ngjarja ka tronditur gjithë zonën pasi u krye në mes të një lokali me njerëz. Sipas mediave greke ka një lidhje mes vrasjes së mbrëmshme në Athinë dhe vrasjes së biznesmenit nga Saranda tre ditë më parë në zonën e Selitës në Tiranë.
Newsit.gr shkruan se 41-vjeçari Kreshnik Çerçizaj, i cili ka marrë pesë plumba në kokë, ka qenë në të kaluarën shqetësim i policisë, pasi ka qenë i dënuar për kontrabandë, drogë dhe grabitje.
“Të premten e kaluar (16.12.2022), u vra në një lokal Edmond Papa, pronar i një hoteli në Sarandë. 49-vjeçari ka marrë disa plumba dhe është transportuar në spital, ku ka humbur jetën pas plagëve të marra. Në Greqi ai ishte dënuar për trafik droge”, shkruan media greke.
Sipas saj, ka mundësi që viktimat të jenë anëtarë të së njëjtës rrjet droge dhe të jenë ekzekutuar nga bashkatdhetarët e tyre.
“Duhet theksuar se në Shqipëri ka shpërthyer një “luftë” mes karteleve të drogës, pasi janë zhdukur rreth 700 kilogramë kanabis, ngarkesë për të cilën ka qenë përgjegjës biznesmeni i vrarë në Tiranë”, shkruan media greke.
