“Sulmi me raketa ruse që vrau 51 civilë ka prekur çdo familje në fshatin verilindor të Ukrainës, Hroza”, kështu deklaroi ministri i Brendshëm i Ukrainës. Në momentin që një kafene u godit nga raketat, në mesin e viktimave ishte dhe një fëmijë 6-vjeçar.
“Nga çdo familje kishte njerëz të pranishëm”, tha ministri Ihor Klymenko.
Për sulmin, Ministria e Mbrojtjes e Ukrainës ka fajësuar Rusinë teksa tha se nuk kishte objektiva ushtarakë në atë zonë. Nga ana tjetër, Rusia nuk e ka komentuar drejtpërdrejt sulmin, por ditën e sotme Agjencia Shtetërore e Lajmeve ruse, “Ria Novsti”, raportoi se ushtria ruse kishte kryer 20 sulme ajrore dhe artilerie ndaj objektivave ukrainase në rrethin Kupyansk, ku ndodhet fshati Hroza. Nuk u tha se kur u kryen goditjet ekzaktësisht, gjithashtu në raportim nuk përmendet fshati Hrozë.
Sjellim në vëmendje se kur raketa goditi fshatin Hrozë, civilët ishin mbledhur pasi kishin marrë pjesë në funeralin e një ushtari ukrainas, i cili ishte po ashtu një banor vendas.
Agjencia e lajmeve Interfax Ukraine citoi prokurorin lokal Dmytro Chubenko të thoshte se e veja e ushtarit ishte mes të vdekurve, si dhe djali dhe nusja e tyre. Ushtari ishte varrosur më parë në Dnipro, por të afërmit e tij thanë se donin ta rivarrosnin në fshatin e tij të lindjes.
Zyrtarët thanë se njerëzit që kishin marrë pjesë në varrim ishin ulur për të ngrënë kur raketa goditi kafenenë që shërbente gjithashtu si një dyqan ushqimesh në fshat.
