Ministri i Brendshëm, Taulant Balla, ka bërë bilancin e punës së Policisë së Shtetit në 24 orët e fundit, ku shprehet se janë arrestuar dhe proceduar 22 persona për vepra të ndryshme penale.
Balla shkruan se rezultatet dhe më të mira priten në orët dhe në ditët në vijim, në kuadër të operacioneve të tjera kombëtare që po zhvillohen.
Postimi i Ballës:
“SUNDIMI I LIGJIT” 22 PERSONA TË ARRESTUAR/ PROCEDUAR NË 24 ORË
Rritja e vigjilencës së Policisë së Shtetit, sigurimi i inteligjencës policore, analizat e riskut në kufi dhe bashkëpunimi me qytetarët po sjellin rezultate përditë, në drejtim të goditjes së shpërndarësve të drogës, të atyre që qarkullojnë me armë zjarri pa leje, të organizimit të kundërligjshëm të lojërave të fatit, si dhe të tentativave për të trafikuar lëndë narkotike, jashtë vendit.
81 kg cannabis sativa, kokainë, armë zjarri dhe sende të tjera të kundërligjshme, të sekuestruara në Kukës, Lezhë, Tiranë, Durrës dhe Fier, në kuadër të operacioneve të Policisë të zhvilluara 24 orët e fundit. 22 shtetas të arrestuar/proceduar për këto paligjshmëri.
Rezultate dhe më të mira presim në orët dhe në ditët në vijim, në kuadër të operacioneve të tjera kombëtare që po zhvillohen dhe do të intensifikohen për goditjen e paligjshmërive në të gjitha fushat që ato shfaqen.
