Nga Anila Hoxha
Nga ngjarjet kriminale me vrasje e fshehje vrasjesh, e deri tek deformim provash për aksidente rrugore, policët janë përfshirë në skena krimi duke i deformuar ato. Që në vitin 2014 ish kryepolici Artan Didi pat deklaruar se asnjë prokuror apo gjykatës nuk mund të ishte aq trim sa të mos dënonte fajtorët kur provat ishin të kopsitura. Akuza e tij binte mbi uniformat blu… Po as në atë kohë, e as në këtë kohë, askush në hiearkinë drejtuese të policisë nuk merr masa. Rastet janë të pafundme me implikime uniformash blu.
Nuk kishte nisur ende zbatimi i reformës në drejtësi, kur Artan Didi drejtori i përgjithshëm i policisë në atë kohë, në një nga tryezat me ndërkombëtarët akuzoi jo vetëm gjyqtarët dhe prokurorët, por edhe policinë. “Nuk ka asnjë prokuror e gjyqtar që të jetë aq trim sa të japë pafajësi kur provat janë të kopsitura” mësohet të ketë thënë ish-kreu i policisë së shtetit në një takim me ndërkombëtarët në mes të bllokut në Tiranë. E kishte të qartë Artan Didi. Nëse policia e bënte punën siç duhej me provat dhe vendet e ngjarjeve, prokurorët dhe gjyqtarët e kishin të pamundur të lëviznin e të bënin ndryshe. Kryepolici, e kishte me të vetët, që duhet të bënin maksimumin për të mos u korruptuar që në gjenezë.
Artan Didi është një oficer i njohur në radhët e policisë. E mori detyrën në fundin e vitit 2013, dhe e la atë detyrë me dorëheqje në mars të 2015. Ka qenë i famshëm në kohën kur drejtonte policinë e shtetit edhe sepse kishte marrë pjesë në operacione ndërkombëtare, madje, në njërin prej tyre, atë të kapjes së arabo-egjiptianit Muhamed Omar Al- Said, mbeti i plagosur. Pas këtij episodi, karriera e tij mori vetëm të përpjetën.
Kur erdhi në krye të policisë së shtetit, njihte çdo procedurë. Eksperienca e kishte mësuar me të gjitha, nga marrja e provave dhe administrimi i tyre, e deri tek mënyra sesi duhet të paraqiteshin para drejtësisë. Por është tjetër gjë të flasësh me fjalë e parime, dhe tjetër gjë, të zbatosh leksionet në realitet.
Ndaj pikëpyetjet e kryepolicit të asaj kohe hidheshin drejtpërdrejt mbi sjelljen që policia kishte në vendngjarje dhe me provat që duhet të administronte e mënyrën sesi duhet t’i administronte. Dhe ai kishte të drejtë. Rast pas rasti, duke nisur dhe në kohën e Didit kur shpërtheu skandali i Interpol Tiranës që nuk kishte njoftuar në kohë drejtësinë për shpalljen në kërkim të Mark Frrokut, veprimet e policisë në skenën e krimit, treguan se nuk bëhej fjalë vetëm për paaftësi, por dyshimet shkonin deri për procedura korruptive.
Megjithatë, pavarësisht përpjekjeve të institucionit që kontrollon policinë, sot e pagëzuar si Agjensia e Mbikëqyrjes policore, hetimet vazhdojnë të mbeten tek oficerë policie të nivelit zbatues. Në këto të dhëna mungojnë drejtues policie, të cilët në rastin më të mirë pavarësisht se u hetuan për çështje si ajo e IMSI Catcher, apo të lirimit të një të kërkuari në Kukës, nuk u gjetën fajtorë nga drejtësia.
Se sa larg kishte shkuar implikimi i oficerëve në çështje të veçanta, e treguan dosje të mëpashme si ai i një oficeri, i cili shtyu një të mitur për të vjedhur; i disa oficerëve të Renea-s por edhe të patrullave të përgjithshme që u gjetën me drogë, apo si ai më i fundit i efektivit Sokol Canameti që kërkoi 2 mijë euro sipas SPAK, pasi nuk arrestoi një të implikuar në histori droge.
Gjykata e Lartë përmend rastin e një oficeri të moshës 52 vjeç, pjesë e Repartit elitar RENEA, i përjashtuar nga policia pasi nuk kishte deklaruar shoqërimin në komisariat në vitit 1989 me motivacionin ‘për tendenca të ndryshme”.
Ish oficeri po ballafaqohet në gjykatën e apelit mbasi refuzon të ketë qenë problematik.
“Shumë kohë më parë kur kam qenë në moshe të re, isha pa filluar punë në strukturat e Policisë së Shtetit dhe si djem të rinj qëndronim pasditeve së bashku në lagje. Nuk mund të kujtoj kohën e saktë, periudhën kohore, por kujtoj se kam qenë shoqëruar nga grupet e gatshme të policisë, të asaj kohe konkretisht në Komisariatin e Policisë nr. 2 Tiranë. Lidhur me këtë rast ishim së bashku me disa shokë të tjerë banore të lagjes dhe pasi na kanë marrë gjurmët jemi lënë të lirë. Theksoj se nuk jam shoqëruar për kryerjen e një vepre penale, apo të jem proceduar penalisht, sikurse nuk kam thirrur në prokurori apo gjykatë lidhur me këtë fakt, apo për ndonjë ngjarje tjetër. Për sa kam deklaruar në Formularin e Deklarimit për zbatimin e ligjit nr. 138 viti 2015 “Për garantimin e integritetit të personave që zgjidhjen, emërohen ose ushtrojnë funksione publike” janë të vërteta dhe nuk ka asgjë për të deklaruar më tepër, apo të kem fshehur ndonjë të dhënë në kundërshtim me këtë lig’ dëshmon ish- speciali D.XH.
Dënimi i oficerit të policisë
Leonard Palushi as do ta mendonte ndonjëherë se elementë të botës së krimit do ta përfshinin në dëshmitë e tyre, aq sa ky i fundit, do të duhet të ndante me ta dhe burgun, pavarësisht se jo, qelinë. Nuredin Dumani, një kriminel, i penduar i drejtësisë, mbi të cilin po ashtu rëndojnë disa akuza, tregoi se si 42 vjeçari me detyrë shef në seksionin e hetimeve të krimeve u bë pjesë e një skenari të pabesueshëm, që nis nga plani për të vendosur një amrë të përdorur për vrasjen e Emiliano Ramazanit në sevisin e Manhasave dhe që e përfshin nënkomisarin në rolin për të treguar vendndodhjen.
Ideja kishte qenë e Erjon Alibej, i cili synonte të përçante Manhasat me Talo Çelën. Megjithatë oficeri betohet se informaconi ju dha nga dy persona të cilët nuk i njohu dhe se më pas zbatoi detyrën duke referuar tek eprorët. Kur këta të fundit u pyetën nga SPAK, treguan mesazhin që u administrua si provë dhe në këtë mënyrë u përjashtuan nga përgjegjësia penale.
“Seit Manahasa ka një pikë servisi, varrezë në rrugën nacionale Peqin. Ka një tendë të rrethuar me kamuflazh ku dhe rri vet Seiti. Mbrapa tendës janë dy pllaka trotuari është dhe një serbator makine, poshtë serbatorit të makinëss është e fshehur një armë” – referojnë prokurorët tekstin e nxjerrë nga telefoni i Arjan Muçës, në atë kohë drejtor i policisë Elbasan. Ai dëshmon se kjo e dhënë ju përcoll nga vartësit.
Por Leonard Palushi iniston me një alibi pafajësie që nuk u konsiderua nga gjykata antikorrupsion. Palushi dëshmon; “Në këtë kohë kam qënë me leje të zakonshme. Paraditen e kësaj date, nuk e mbaj mend orën fikse, unë kam qënë në lagje, në Astir, Tiranë. Aty ka ardhur të më takojë një person, i cili mbaj mend, më ka pyetur konkretisht: “Ti je në Elbasan shef krimesh”, – diçka e tillë. Ky person më pyeti “Ti a ke të drejtë të marrësh informacion lidhur me ngjarje”. I jam përgjigjur se po, pasi këtë detyrë kam. Ky person më ka treguar telefonin e tij, ku i kishte ardhur një mesazh i dërguar nëpërmjet një aplikacioni, por se çfarë aplikacioni ishte konkretisht nuk kam arritur ta dalloj, ta shquaj fiks. Këtij mesazhi, i kam bërë foto nëpërmjet telefonit tim, Iphone 7 më duket, dhe mendoj se e kam të ruajtur në një nga aplikacionet online për ruajtjen e fotove. Si telefon nuk e kam më pasi para 7-8 muajsh afërshisht e kam ndërruar se nuk mbante bateri. Nuk e mbaj mend se çfarë i kam bërë apo ku e kam lënë si telefon. Në përmbatje të mesazhit bëhej fjalë pak a shumë se një armë që ka bërë krimin, vrasjen e Ilit, është e fshehur te servisi i Manhasave. Ky mesazh, si tekst ishte pak më i zgjeruar, ku përmendej se këta persona (Manhasat) ishin lidhje e Talo Çelës, me sa mbaj mend. Ky person më ka takuar vetëm, por mendoj që ishte me një person tjetër, që ishte në distancë. Personat u larguan dhe pas këtij momenti kam kontaktuar me drejtorin Arjan Muça dhe kam ikur drejt në Elbasan. E kam takuar në një lokal në hyrje të qytetit të Elbasanit dhe e kam vënë në dijeni për informaiconin që më dha personi në Astir. Pasi jam takuar me të, kemi diskutuar mbi këtë informacion, mendoj se i kam treguar edhe foton e mesazhit.
Të vërtetën se pse ishte vendosur pistoleta e rrëfen i mbrojturi i drejtësisë Nuredin Dumani. Ishte pjesë e një skenari kriminal të përpiluar nga Erjon Alibej. “Manhasat ishin shokët e Talos dhe ishin qitësa dhe Erjoni donte që të krijonin konflikt midis Manhasave dhe grupit të Talos. Arma ishte lenë tek servisi nga Klevis Kapllani me porosi të Erjon Alibej.Personi që ka gjet armën dhe ka arrestuar Manhasat, ka qënë shef krimesh i lidhur me Alibej, ka qënë njeriu i tij (e ndihmonte Erjonin). Sipas Nuredinit, Erjoni i kish thënë se ja ka dërguar policit nëpërmjet telefonit Scy vendin ku ishte arma”.
Por edhe personazhi i dytë që përmendet nga Dumani, Erjon Alibeaj, vizituar disa herë në shtëpi nga oficeri, tregon mirënjohjen ndaj policit mbasi askush nuk e arrestonte sepse “shefi” kishte informacion për makinën me të cilën qarkullonte. Për t’i shprehur respektin në një rast i dhuroi makinë e në një të dytë i instaloi kamera sigurie në një lokal që Palushi thuhet se po e arredonte. Për të dyja dhuratat oficeri pat kundërshtuar e pastaj kishte heshtur.
“Leonardi, para se të merrte makinën më ka pyetur sa duhej të paguante për makinën dhe kë duhej të paguante. Leonardit i kam thënë se nuk i detyrohesh askujt pasi e ke dhuratë nga unë. Kjo sepse e ndieja veten shumë borxhli ndaj Leonard Palushit, për aq sa kishte bërë në lidhje me veprimet e tij në rastin e arsenalit tek banesa e Ervis Dakës (Drakoviçit)”.
Nuk ishte në vendngajrje atentatesh, por sërisht edhe aty…
Polici Fatjon Moni, po bënte karrierë të ngadaltë në policinë rrugore. I riu nga Semani, baba i një fëmije por që sipas dosjes së gjykimit rezulton ende ‘beqar’, kishte detyrën e oficerit të policisë gjyqësore që kqyr vendngjarjet e aksidenteve, shkruan e firmos procesverbalë arrestimesh për të dehur, apo shkaktarë aksidentesh. Larg vrasjeve mafioze, vendngjarjeve me atentate e të kërkuar, normalisht një skenë e tillë është ndër më të lehtat për t’u kqyryr dhe për të konkluduar.
Por edhe aty doli se kishte të aksidentuar që përcilleshin spitaleve të plagosur e më pas u duhej të mbronin të panjohur që i përplasën me pretendimin se ishin rëzuar vetë. Edhe aty, kishte të dehur që nuk iu bë testi i alkolit, ndonëse në parakalim e sipër, vranë këmbësorë. Dosja hetimore që ju vendos në dispozicion Newsbomb.al, shpjegon përgjimet e gjata që ishin nisur për tjetër gjë, dhe përfunduan me policin që sot lutet për pafajësi.
Hetimi
Kur prokurori Shpëtim Garunja i kujtonte ligjin në telefon oficerit Fatjon Moni duke përsëritur ‘ligjin Fatjon, vetëm ligjin, ligji nuk të le në baltë’, as ai dhe as polici nuk e kishin idenë se ndërkohë biseda po përgjohej. Ishte viti 2021. Pas dy autorizimeve të njëpasnjëshme, afatet ishin zgjatur dhe kishin në fokus një hetim që në ndjekje e sipër po përpiqej të zbardhje një çështje prostitucioni. Por rrugës, dhe me ditët që kalonin e rrethin e personave që zgjeroheshin nga përgjimet, pazaret që po kryheshin pranë policisë rrugore në Tiranë, ndryshuan qëllimet e hetuesve.
Një shofer në gjendje të dehur, që ishte kapur prej policit Moni, por që në fakt, ky i fundit nuk i kishte bllokuar automjetin, apo ta vendoste atë në ruajtje si provë materiale, duket se hapën një “odise” të vërtetë çështjesh të mëvonshme. Numër pas numri vendosur në përgjim, prokuroria nuk po dinte se ku ta niste e ku ta linte çështjen e një polici që kishte në dorë vendngjarjet e aksidenteve.
Procesverbali që mungonte në këtë rast tregon se prokurori është i skandalizuar ndërkohë që polici e qetëson se do i sillte shkresat dhe për këtë përsërit ‘në rregull prokuror’. I riu që thotë këtë fjali, në shumë biseda të tjera të zbardhura, shfaqet herë si zbatues i ligjit, herë me një tolerancë që prokuroria e vlerëson se është shpërdorim detyre. Pas bisedës llogaridhënëse date 24 korrik 2021, në vazhdën e komunikimeve të përgjuara të nënkomisarit zgjeroheshin edhe emrat me të cilët ai fliste. Në episodet në vazhdim përgjimet e prokurorisë e bëjnë akoma dhe më të dyshimtë punën e policit. Në përgjimin e rradhës, i dyshuari për shpërdorim detyre telefonohet për një aksident ku i dëmtuar kishte mbetur një fëmijë dhe autori as që ishte proceduar prej tij.
Aty flitet për një fëmijë të plagosur që kishte përfunduar vetëm në spital, por ata që e aksidentuan dhe që në bisedë kuptohet se është përfaqësues ambasade, nuk u proceduan. Sipas bashkëbiseduesve, njëri prej të cilëve me numër 068 34 61460 që deklarohet i paidentifikuar, një fëmijë ka qenë duke kaluar në vijat e bardha në çastin që është goditur nga një mjet dhe kjo sekuencë provohet nga një video.
460- Ti i ke bërë letrat, ç’a është kjo o vëlla se kam bërë dhe unë aksident dhe s’më ka lënë kush të dal prej burgut pa ardhur familjarët e personit.
Por Moni e qetëson se autori i aksidentit e kishte çuar fëmijën në spital dhe se më pas kishin përpiluar procesverbalet.
Moni – Unë jam mësuar me këtë llogari o vëlla. Tani sa për ta takuar atë nuk e di se do ikte në dasëm ai a çfarë prandaj nuk ka kohë ai. Ai është treguar shumë korrekt, është punonjës security tek ambasada japoneze dhe nuk është ndonjë alabak.
460- Prandaj qenka i lirë se qenka punonjës ambasade?
Moni- Ai mund të jetë çfarë të dojë, ligji është njësoj.
460- O shef po ata që punojnë në ambasada a punonjës shtet ju i lini të lirë , kurse të tjerët i kapni direkt.
Moni – Ambasada është privat, nuk është shtet.
460- Mirë mirë se do ta ndjekim në rrugë tjetër, por do të përfshihesh edhe ti në këtë rast?
Moni- Po më bën presion mua?
460- O shoku ti e ke pasur në dorë dhe e ke lënë të lirë. Dhe fëmija i presidentit të ishte …
Por ky episod nuk është konsideruar si shpërdorim detyre nga hetimet për rrethana të pashpjeguara në dosje. Një nga shkeljet e dyshuara të oficerit është ai i një aksidenti të ndodhur në afërsi të zonës së Kupolës, në Laprakë.
Teksa polici Moni tenton të lidhet me sallën operative dhe ndesh në vështirësi, telefoni ishte hapur ndërkohë kur polici nën akuzë e mëson qytetarin ‘o vëlla kështu e lëmë, u rrëzove vet”. Kur më në fund realizohej komunikimi me sallën polici, deklaron : “është rrëzuar vet, mora deklaratë administrative.” Kjo bisedë kryhet nga Spitali i Traumës, aty ku i dëmtuari kishte shkuar për mjekim. Realisht në të njëjtën datë, salla operative ishte njoftuar për një aksident, kur veprimet ishin kryer nga oficeri i dyshuar dhe një agjent verifikues. Për shkak të telefonatës së dyshimtë, prokuroria dyshon se realisht personi që u dëmtua në aksident dhe që nuk u raportua si i tillë është shtetasi Kristian Leka, dhe personi që ishte interesuar për të në spital ishte shtetasi Ermelind Demiraj.
‘Gjatë qarkullimit në rrugën ‘Dritan Hoxha’ për të shmangur përplasjen me një automjet ‘Toyota’ që më preu rrugën , humba drejtimin e motorit elektrik pa targa dhe u rrëzova. Në vendin e ngjarjes mbërriti një oficer policie që më bëri testin e alkoolit dhe njoftoi një autoambulancë. Në spital më vizitoi një familjar i drejtuesit të mjetit i cili më la shumën prej 100 mijë lekë të vjetra”, – thotë qytetari. Nga hetimet konfirmohet se një polic tjetër, i kishte vendosur gjobë vetëm të dëmtuarit nga aksidenti. Ajo çfarë konsiderohet si provë për prokurorinë është një transkript i bisedës telefonike ku një shtetas denoncon aksidentin dhe të plagosurin nga përplasja, i cili u mësua nga një polic që të këmbëngulte se ishte rrëzuar vetë.
Operatori – Policia e shtetit!
Denoncuesi – Në Laprakë, këtu përballë me motorr elektrik është rrëzuar njëri. Djali është në tokë. Makina ka ndaluar dhe po e ndihmojnë.
Operatori- Ka dalë nga rruga?
Denoncuesi- Po, është përplasur me makinën. Ka ndaluar makina dhe po e ndihmojnë!
Në këtë rast, evidenton prokuroria, oficeri nuk ka kryer detyrën, duke mos raportuar asnjë të dhënë për gjeneralitetet e drejtuesve, apo targat e mjeteve të përfshira në aksident si dhe nuk ka administruar asnjë dëshmi të personave të pranishëm. Veç kësaj, nënkomisari nën gjykim nuk ka referuar materialet për hetime të mëtejshme pranë prokurorisë.
Një muaj pas kësaj, ndaj oficerit, një qytetar që zotëron një biznes për dhënien me qera të automjeteve u ndesh me problemet që të sjellin ndonjëherë ata që duhet të jenë zbatuesit e ligjit. Mjeti i dhënë me qera nga 30 vjeçari përfundoi tek persona të panjohur, pasi shtetasi me të cilin kishte lidhur kontratë, u konstatua duke drejtuar mjetin në gjendje të dehur. Ai u arrestua dhe këmbëngul, se i kërkoi të akuzuarit, t’i kthente makinën pronarëve realë. Diçka e tillë nuk ndodhi dhe këtë gjë ai e mësoi kur u lirua pak orë më vonë nga gjykata e kryeqytetit.
‘Punonjësi i policisë në momentin që u konstatua shoferi i dehur ja ka dhënë makinën një personi të paautorizuar dhe të panjohur. E gjeta makinën me ndihmën e një qytetareje , e cila më tregoi se ja dhanë mjetin disa çuna’ – ankohet 30 vjeçari.
E njëjta skemë dyshohet se u ndoq edhe për një aksident në Sauk –Farkë ku mbeti i vrarë Shefqet Sehitaj. Në veprimet e para hetimore të kryera prej Monit shoferit që parakaloi dhe përplasi qytetarin nuk ju bë testimi me dragger dhe nuk ju administrua mostra e gjakut.
Si nisi?
Por Moni nuk ishte vetëm në përgjime. Fati i tij, e deshi që të ishte dhëndërr në familjen Sadikaj, e cila kishte si anëtar Aleksandër Sadikaj. Ndaj mes të përgjuarve pati dhe të tjerë oficerë policie, lidhje krushqie apo njerëz të interesuar që pyesnin se a mund të zgjidhte punë shefi i komisariatit rrugor të asaj kohe E.A, apo ai i një policeje të sallës operative e cila u dyshua se përcillte informacione përpara se patrullat të niseshin për kontrolle lokalesh. Megjithatë, mes shumë të hetuarve, prokuroria nuk mundi të provonte shitjen e sekretit hetimor nga ana e punonjëses së policisë me të dhënat O.K, e cila dyshohej se njoftonte të interesuarit përpara se patrullat të nisnin kontrollet në lokale. Por duke e përgjuar dhe atë, më pas u krijua bindja se vajza nga Bulqiza që kishte pak kohë në polici, bisedoi në Instagram me një tjetër grua për të përftuar të dhëna nga sistemi TIMS për një shtetase. Megjithatë edhe ky dyshim nuk u provua mbasi Drejtoria e Teknologjisë nuk gjeti logime konkrete për vajzën A.H. veç atyre në pikat kufitare.
Siç kuptohet nga fashikulli i konsiderueshëm i përgjimeve, oficerja u dyshua se ndërkohë ishte ‘eskortë’ përderisa flet me një numër tjetër në telefon për një person mashkull. ‘Hajdeni të dy s’ka gjë se e bëj dhe atë për pesë minuta’, – shprehet oficerja që u hetua për tregtim sekreti shtetëror dhe prostitucion, por asnjëra nga këto versione nuk u arrit të provohej ndaj dhe hetimi u pushua.
Ky dorëzim i prokurororisë u miratua nga gjyqtari paraprak Sokol Pasho, i cili vendosi ta kalojë dosjen nën shqyrtim në dhomën penale, me vetëm një oficer të akuzuar. Në të njëjtën kohë, gjykimit i shpëtoi edhe vjehrra e oficerit, një 61-vjeçare, e cila është nëna e Aleksander Sadikaj, i vrarë gjatë verës së 2022 nga një shpërthim i telekomanduar, në Tiranë. Edhe për të, akuzat ranë, edhe pse u hetua për një pistoletë që përmendet në komunikimin telefonik dhe që me gjasë kishte humbur në biznesin turistik në Memaliaj. Arma që përflitej dyshohej se ishte vjedhur nga njëri prej turistëve dhe që i ndjeri Aleksandër Sadikaj i revoltuar përmend se kushtonte nga 5 deri në 6 mijë euro. Për ngjarjen Silvana Sadikaj i ankohet të bijës që është bashkëjetuese e policit Fatjon Monit.
..854: Ca po bën mire je?
Silvana: Asgjë, ja humbi një gjë e rëndësishme këtu. E morën sy më sy këtu… se kush e mori!
..854: Ca humbi moj?
Silvana : Ehu, një nga ato , të rëndësishmet fare të shtrenjtat.
854: Çantat?
Silvana : E hu ….Aman edhe ti , një kështu se sdua të flas në telefon, që kishte djali në çantë .
854: (Flet greqisht), nuk kuptohet.
Silvana: Iva dje që mori çantën ja dha Ujkut, kur ka ikur Ujku, ajo dje ishte në çantë, sot nuk është. Unë bëra luftë të paparë, thashë që ka qenë dje në çantë ai s’më beson, i beson atyre Invës dhe Albit .
854: (flet greqisht) dhe kuptohet fjala Pistol dhe Pistoliti . Eeee, ai thotë që bën 5-6 mijë euro.
Armë të humbura
Në një nga përgjimet një oficer që ndërkohë ndiqte përmes kufjeve bisedat shkruan për grindjen në familje për një armë.
“Në vazhdën e këtyre hetimeve konstatohet se jemi përpara fakteve se në fermën që administrohet nga shtetasja Silvana dhe Aleksandër, përkatësisht vjehrra dhe kunati i punonjësit të policisë Fatjon Moni, ndodhet një armë zjarri e tipit pistoletë,” thuhet në dokumenta.
Biseda zhvillohet mes Silvana Kalemit dhe numrit 069…..302 që ishte në përdorim nga i ndjeri Aleksandër Sadikaj. Komunikimi vazhdon me tone të ashpra.
Silvana : Alooo alo…
302 : O Silvana është vjedhur është humbur tek shtëpia e madhe ….kush e ka shkarkuar shtëpinë e madhe .
Silvana: O atje isha unë o biri i mamasë, unë kam 20 vjet me atë jam rritur në lagje , në klasë , është vajzë e urtë ajo o vlla, të keqen mami .
302 : Është shkarkuar…. ka qenë tek shtëpia e madhe kush e ka marrë , e ka lënë atje ajo , dhe e ka lënë atje në ndonjë komedinë a në ndonjë vend atje . E kanë marrë ata të shtëpisë atje. Ik bëj namin atjeee , i thuaj kam oficer dhëndërin dhe ka humbur armën e shërbimit dhe është problem i madh se po vjen dhëndëri me njerëzit. Duhet ta gjejmë se sbën se ka humbur këtu te kjo shtëpi ka qenë dhëndëri me vajzën .
Nga të dhënat zyrtare të Agjensisë së Mbikqyrjes policore në varësi të Ministrisë së Brendshme rezuton se për një vit janë ankuar për policinë shqiptare 1970 persona. Bie në sy fakti që numri më i lartë i denoncimeve janë ndaj policisë së rendit. Në vend të dytë për pakënaqësitë renditet policia rrugore dhe e treta sektori i hetimit të krimeve. 29 përqind të rasteve janë për pretendimet e shpërdorimit të detyrës dhe korrupsionit.-Revista Newsbomb.al
