FIER– Një 40-vjeçar ka rënë në prangat e policisë së Fierit pasi tentoi t’i vinte flakën një lokali në lagjen ‘Apollonia’ në Fier. Altion Sulejmanaj dyshohet se pas një sherri për motive të dobëta që ka pasur me pronarin e lokalit të identifikuar me inicialet S.M , ka hedhur pas mesnate, një sasi të vogël lënde djegëse. Më pas i ka vënë zjarrin duke bërë që flakët të përhapen dhe të dëmtojnë pjesën hyrese të biznesit.
NJOFTIMI I POLICISË:
Tentoi të digjte me lëndë djegëse, një lokal, për motive të dobëta, Policia identifikon dhe vë në pranga autorin. Shërbimet e Policisë, pas marrjes së njoftimit se në lagjen “Apollonia”, Fier, kishte rënë zjarr në lokalin në pronësi të shtetasit S. M., kanë shkuar mënjëherë në vendin e ngjarjes, së bashku me shërbimet zjarrfikëse, të cilat bënë të mundur fikjen e zjarrit. Në vijim të veprimeve hetimore të kryera nga shërbimet e Policisë, është identifikuar autori i dyshuar i kësaj ngarjeje, shtetasi A. S. Ky shtetas dyshohet se për motive të dobëta, ka hedhur pas mesnate, një sasi të vogël lënde djegëse, në lokalin e shtetasit S. M., dhe e ka ndezur atë. Si pasojë e përhapjes së flakëve është djegur pjesa hyrëse e këtij lokali. Në përfundim të veprimeve, specialistët për Hetimin e Krimeve të Komisariatit të Policisë Fier arrestuan shtetasin A. S., 40 vjeç, banues në Fier, për veprën penale “Shkatërrimi i pronës me zjarr”. Materialet do t’i kalojnë Prokurorisë, për veprime të mëtejshme procedurale.
