Nga turizmi, te marrëveshja me Italinë për emigrantët, e marrëdhënia me Kryeministrin Edi Rama, Kryebashkiaku i Lezhës Pjerin Ndreu i ka zbuluar të gjitha në një intervistë për “Mirëmëngjesi Shqipëri”. Kryebashkiaku Ndreu teksa bëri me dije se turizmi në Lezhë ka ardhur nga viti në vit, në rritje, u ndal më tej te marrëveshja për emigrantët, duke theksuar se në Shëngjin nuk do të ketë kamp.
Ai u shpreh se Shëngjini do të jetë pikë hyrëse për emigrantët me qëllim dërgimin e tyre në Gjadër.
“Menaxhimi ynë i sezonit turistik në bashkëpunim me operatorët turistikë ka qenë në rritje çdo vit. Nuk them se s’ka defekte, por është ku e ku me atë që kishim.
Në Shëngjin nuk do ketë kamp. Do dalin të huajt në rrugët e Shëngjinit dhe do i vrasin sytë turistëve, kjo është përrallë dhe turp për ta treguar në çdo vend të botës. Ne kemi një lagje rome dhe egjiptiane dhe janë njerëz të shkëlqyer.
Në Shëngjin edhe nëse do ndodhë do jetë si pikë hyrëse dhe do ikë në Gjadër. Nuk ka lidhje me Shëngjinin. Afrikanët nuk e kanë Shqipërinë opsion për të dalë e për të punuar, se po ta kishin për kaq vite demokraci do e kishin bërë Shqipërinë të kishte ikur me kohë. Ky racizëm i çuditshëm që identifikojnë ngjyrën e lëkurës me pjesëmarrjen këtu është i pajustifikueshëm. Në kemi pritur e përcjellë rreth 4 mijë afgan dhe 600 janë akoma aty, jo vetëm që s’ka ndodhur asgjë, por janë integruar shumë mirë”, tha Ndreu.
Ky i fundit u ndal më tej te komunikimet me Kryeministrin Edi Rama, për të cilin theksoi se nuk ndërhyn kurrë në punët e kryebashkiakëve. Ndreu u shpreh se Rama të lë gjithë hapësirën e nevojshme për të punuar.
“Komunikojmë shpesh. Kush nuk e njeh Edi Ramën e bën këtë pyetje. Ajo që më bën më të afërt, është se unë jam më i nxituar kur kërkoj gjëra. Ai ka qenë kryetari bashkisë tiranë, unë drejtori i policisë tiranë dhe ai ma njeh tipin, ma njeh mënyrën e të vepruarit. Nuk kam konstatuar se me të tjerët sillet ndryshe. Ai kujdeset që të gjithë kryetarët e bashkive që ndjejnë se e kanë përkrahjen e tij. Ai e ka veti këtë. Edi Rama kurrë nuk ndërhyn në punën tonë, kurrë nuk ndodh që të thotë pse e bën këtë, pse e hoqe këtë.
Edi Rama të lë gjithë hapësirën e nevojshme që ti të punosh. Nëse e bën mirë, ta thotë, nëse e bën keq, ta thotë.
Ka pasur raste që i kam thënë jo. Ja kam thënë disa herë. Ka pasur një mendim ndryshe, unë e kam pasur ndryshe. Nëse dy herë ti i thua jo, dhe e bind, atë herë nuk ka problem ai. Kurrë nuk di ndonjë rast që të vejë veton nëse ti si drejtues lokal e argumenton diçka. Nuk mbaj mend ndonjëherë të ketë thënë jo me arrogancë.
Edhe ne ndonjëherë jo të gjitha kërkesat i kemi të argumentuara si duhet. Me Ramën duhet të kesh argument, projekt. Nëse se ke, mos u nis.
Nëse unë vij në bashki dhe gjej zero projekte, cila qeveri ta jep? Rama jo e jo njëherë. Nuk ke bërë projekt, nuk e argumentove dhe nuk i thua se çfarë drejtimi zhvillimi çon kjo, çfarë impakti jep, nuk ke marrë asgjë, zero”, theksoi Ndreu.
