TIRANË– Kryeministri Edi Rama duke folur nga foltorja e Kuvendit ku mbrojti propozimin e tij për ligjin e dekoratave tha se kjo është e vetmja mënyrë që kjo punë të futet në shinat e Bashkimit Europian. Kreu i qeverisë nuk la pa shenjestruar dhe kreun e Partisë së Lirisë, ish-presidentin Ilir Meta, ai tha se kur ai ishte Kreu i Shtetit u dhanë dekorata edhe për të vdekurit.
Edi Rama: Sot, ne bëjmë një ligj i cili e rifut vendin tonë në sistemin e rrugës evropiane. E ndan nga komunizmi, jugosllav, kinez e lindor. Të gjitha vendet në rajon, në Evropë, në Perëndim e në lindje kanë të njëjtin sistem dhe të njëjtat rregulla. Presidenti i mëparshëm i republikës arriti të dekorojë Ismail Qemalin. Dmth, një grup njerëzish sado të nderuar por totalisht për tu harruar vendosin të japin dekoratat postmortum. Çfarë është një dekorim? Është një moment kur njerëzit dallohen nga të tjerët, të gjallët dallojnë njerz mes të gjallëve. Nuk ekziston një moment kur të gjallët dallojnë dhe dekorojnë të vdekurit. Dhe ndërkohë, prodhohen medalje dhe u jepen stërmbesave. Është diçka që nuk ka ndodhur dhe nuk ndodh askund. Dekorimi pas vdekjes është tipik allashqiptar, i allademokracisë. Një hamletologji e paimagjinueshme. Tangërllëk provincial. Një ushtar të rënë në luftë në atë moment, në kohën që jetojmë së bashku, patjetër. Një njeri që vetmohohet për të tjerët në një akt heroizmi, patjetër. Dmth çohet njeri në mëngjes e thotë “Dua të bëhem Vojo Kushi” dhe i dekoron. Duke menduar se një ditë, do bëhet si Vojo Kushi. Shqipëria është në botë tjetër për pjesën e dekorimeve. UI dhanë 500 dekorata, komplet pa sens. Shqipëria është vend qesharak në këtë fushë. Jemi 70 vjet me vonesë, por e bëjmë këtë gjë vetëm sot. Shpresoj që të votohet nga të gjithë.-
