TIRANË– Pas debatit mes kryeministrit Edi Rama dhe deputetit Gazment Bardhi, diskutimet vijuan edhe më pas. Ka qenë deputetja demokrate Flutura Açka ajo që i ka kërkuar kreut të qeverisë që të jetë më i kujdesshëm me fjalët dhe të mos ofendojë. Ndërkohë ka ndarë dhe një kujtim të vitit 1998 gjatë kohës që jetonte në Amsterdam dhe Rama kishte shkuar atë kohë për vizitë në shtëpinë e saj bashkë me disa të tjerë, atë kohë kryeministri ka qenë emigrant. Po ashtu Açka u kujdes ti kujtonte kreut të ekzekutivit që e kishte zhgënjyer pas protestës së 21 janarit të vitit 2011 duke u shprehur se ai ka ende kohë të ndryshojë.
Nga ana tjetër kryeministri u kujdes që ti përgjigjej “flakë për flakë” deputetes duke i thënë se dhe ai njeri është dhe ka momente që nervat nuk kontrollohen si dhe i kujtoi se ato fjalë që u hodhën në drejtim të tij janë të pavërteta dhe akuza të rrema. Ai u rikthye sërish tek problemet e brendshme në Partinë Demokratike duke thënë se shprehjen vulhumburit e kishte për deputetët që mbështesin Sali Berishën. Duke u kthyer tek debati me Bardhin Rama pyeti Açkën se si do të ndihej ajo nëse do i thonte se ajo ka bërë prostitucion në Hollandë.
Diskutimet:
Flutura Açka: Nuk kam ndonjë gjë, nuk kam replikë me kryeministrin. Po është e vërtetë unë shkoj në Amsterdam, shkoj se kam nevojë të purifikoj shpirtin dhe mendjen, por edhe për të marrë copy-right. Dua të të kujtoj rastin kur ka shkuar kryeministri. Në shtëpinë time në Holandë, ku jeni ulur ju në vjeshtën e vitit 1998. Ishit emigrant, bashkë me disa miq tuajt, keni pirë kafe. Është akoma karrigia. Kur të bëni muzeun, shkoni dhe e merrni. Ua kam ruajtur. Nga ajo karrige jeni ngritur dhe keni shkuar ju në Amsterdam. Ju folët që nuk ia shpjegoni dot djalit fjalorin e përdorur nga zoti Bardhi. Nejse kaloi, do të bëni mirë që t’i shpjegoni dhe fjalën që keni përdorur për opozitën (gojore) të mos e them për të dytën herë, do e kërkoja sinqerisht që sot të kërkoni ndjesë. Edhe sot. Unë vërtetë do të mendoj se ke ndryshuar. Atë fjalë nuk e kam pranuar kurrë dhe nuk do e pranoj kurrë. Sa për zotërinë që thatë, për liderin historik, e nderojmë për atë pjesë që kam. Ai që kemi në krye, mos ma kujtoni mua por kujtojani vetes. Ne si grup e kemi bërë distancimin, e çmojmë, siç edhe ju kur t’ju vijë koha. Unë kisha besim tej ju se iu njihja. Por që nga 21 janari, më keni zhgënjyer personalisht, ndaj mbaj këtë qëndrim ndaj jush.
Edi Rama: Nuk kam asnjë pretendim që kam ndryshuar. Nuk e thashë dhe nuk ua plotësoj dot kërkesën. Kam një këshillë, kur t’ju kujtohet fjala mos t’ju shkojë mendja për keq. Kjo është këshilla ime. Tek shpresat që keni pasur tek unë, do i shihni gjërat më kthjellët. Pastaj pyetja pse kam shkuar në Amsterdam, përgjigjia është për disa lidhje kriminale që kam pasur që në atë kohë. Nëse do t’ju thosha që ju keni bërë prostitucion në Hollandë, do të ruanit qetësinë ju? Nuk besoj, ju do të iknit nga mendja, do të thonit gjërat më të fundit. Dhe me të drejtë, se unë duhet të kem prova kur them që je marrë me prostitucion në Hollandë, ndryshe s’e bëj dot. Si e pranoni ju këtë gjë, kur ju flisni për bullizmin e për libra. Si ju duket ju kur del ai e u flet grave në atë mënyrë. Çfarë janë këto? Të ruash qetësinë me këto? Si mund ta bësh me këtë gjë. Unë s’kam as dkorata, kam një certifikatë bojaxhiu, kaq, as bachelor, as master, as doktoraturë. E njoh Shqipërinë për arsye të detyrës. Ju kam thënë që do përfundonit më keq. Ju kujtoni se shqiptarët janë budallenj dhe tërhiqeni për hunde. Për vulëhumur s’e kam me ju, por ata atje në fund. Vula u duhet ca të tjerëve që s;bëjnë punë tjetër. Më mirëkuptoni kur them ato fjalë, në momentin që ai më thotë ‘mafioz’, ‘kriminel’. Nuk mund të ngre pyetjen nëse ai në fund atje, është idiot apo jo, kur ai thotë je offshore. Sepse nëse do të isha offshore, do të isha para drejtësisë.
