KOSOVË-Në konferencën e sotme për mediat Ministri i Punëve të Brendshme, Xhelal Sveçla, ka thënë se institucionet e Kosovës i kanë të gjitha kapacitetet që t’i largojnë barrikadat e vendosura në veri të vendit tani e 13 ditë.
Ai ka thënë se mënyra më e mirë është që largimi i tyre të bëhet nga vetë ata që i kanë vendosur. Sveçla ka thënë se po presin që sa më parë të ketë veprime nga KFOR-i për heqjen e tyre.
“Ngjarjet dhe zhvillimet e fundit të transmetuara në mënyra të ndryshme nga mediume të ndryshme kanë shqetësuar edhe më shumë qytetarët anembanë. Barrikadat në veri të vendit janë praktikë e njohur për të gjithë ne, ato po organizohen nga grupe të ndryshme kriminale të armatosura dhe po mbahen nga qytetarët të cilët po kërcënohen nga strukturat kriminale të orkestruara nga Beogradi… Barrikadat tashmë kanë humbur arsyen me të cilën at ai patën ngritur. I vetmi qëllim i tyre është bllokimi i veprimeve ligjore të Republikës së Kosovës.
Ministri Sveçla ka shtuar se, tash përreth barrikadave çdo ditë po njoftohemi me kërkesa të reja të shtyra nga Serbia, për arritjen e qëllimeve të tyre politike.
“Por tash përreth barrikadave çdo ditë po njoftohemi me kërkesa të reja të shtyra nga Serbia, për arritjen e qëllimeve të tyre politike. Kërkohet lirimi i Pantiqit që padyshim është i papranueshëm, Policia e Kosovës e ka arrestuar sipas kërkesës së organeve të drejtësisë dhe se nuk është detyrë e policisë së Kosovës lirimi it ë arrestuarve, por është ushtrimi i autorizimeve të tyre dhe zbatimi i urdhërave në mënyrë të ligjshme të bazuara në Kushtetutë. Mu për shkak të barrikadave, bllokimit të rrugëve dhe lirisë së lëvizjes, ai po mbahet në stacionin policor në afërsi të kufirit në Jarinjë. .. Lidhur me këtë rast ne kemi proceduar kërkesën tek partnerët tanë për transferimin e tij në objektet adekuate që të vazhdojë paraburgimin dhe procedurat e mëtutjeshme. Prandaj për ne mbetet prioritet transferimi i tij përmes bashkëpunimit me partnerët tanë. .. Mënyra më e mirë është largimi i tyre (barrikadave) nga vetë ata që i kanë vendosur .
Ministri i punëve të brendshme ka shtuar po ashtu se Serbia po përdorë edhe propagandë masive, e në raste të caktuara fatkeqësisht e mbështetur edhe nga grupe e individë brenda Kosovës.
“Por, më duhet të ritheksoj se ne kemi të gjitha kapacitetet e nevojshme për largimin e këtyre barrikadave. Për shkak të situatës jemi në koordinim me partnerët tanë ndërkombëtarë dhe presim që sa më parë të veprohet nga KFOR-i. .. Përveç situatës në terren, Serbia po përdorë edhe propagandë masive, e në raste të caktuara fatkeqësisht e mbështetur edhe nga grupe e individë Brenda Kosovës… Një e pavërtetë që po përdoret në vazhdimësi ka të bëjë me lajmin se kinse policia e Kosovës ka lista në bazë të të cilave po arreston ish policë. Policia e Kosovës nuk ka lista të tilla, nuk ka asnjë listë as për përndjekje e as për vrasje të qytetarëve serbë. Kjo është logjika që Serbia ka ushqyer historikisht. Pra lista bëjnë ata të cilët vranë edhe Oliver Ivanoviqin dhe shtypin e maltretojnë serbët e padëgjueshëm ndaj Beogradit. .. Policia do të vazhdojë të zbatojë ligjin përkundër sfidave me të cilat përballemi edhe gjatë kryerjes së detyrave në veri të vendit. ..Ata janë profesionistë e të trajnuar për menaxhim të çdo situate andaj nuk mund të minohet ky fakt e të flitet për çfarëdo lodhje dorëzim apo keqësim të gjendjes së tyre.
