Skandali në Dogana, Vasili: Denoncimet me shkresa zyrtare, SPAK çfarë pret?!
Deputeti i Partisë së Lirisë, Petrit Vasili i ka bërë thirrje SPAK që të reagojë dhe të nisë hetimet për skandalet abuzive të drejtorit të Doganave, Genti Gazheli.
Vasili thekson se pavarësisht shkresave zyrtare, SPAK ende pret të veprojë.
Mes të tjerash ai shprehet shkruan se, “Edi Rama përfaqëson Ali Babën me 40 hajdutë ku në çdo institucion ka nga një hajdut”.
Denoncohet me shkresa zyrtare hajdutëria sheshit në Dogana, o SPAK ku je, çfarë pret më? Edi Rama dhe qeveria e tij është shndërruar në simbolin e vjedhjes dhe grabitjes së përditshme të qytetarëve. Kulmi arrin kur Shefit i Anti-kontrabandës Detare nxjerr në shesh situatën e tmerrshme të korrupsionit në Doganat Shqiptare. Përgjegjësi i antikontrabandës detare e ka njoftuar me e-mail Drejtorin e përgjithshëm të Doganave si dhe i është drejtuar edhe me një shkresë zyrtare për situatën e korrupsionit kapilar në dogana.
Shefi i antikontrabandes detare thotë: “Në pikën doganore Kapshticë e njohur më së shumti për “golat” gjatë ditës dhe “gomat e përdorura” gjatë natës, mallrat me origjinë kineze, atletet, veshmbathjet etj, janë bërë tashmë të rëndomta. Shprehja “i paguhen prurësit me të parë” duket se është bërë ekskluzivisht për këtë pikë doganore. Durrësi me portin e tij është kthyer han me porta të shqyera pasi Monitorimi, Informacioni, Antikontrabanda, Hetimi Doganor duket se janë kokë e këmbë të dashuruar me doganierët lakmitarë e të dashuruar pas eurove, ndryshe s’ka si shpjegohet që askush nuk kthen për kontroll qoftë edhe një mjet sado i parëndësishëm qoftë. Furgonat anglezë dalin plumb dhe autobusët e linjave nuk kontrollohen fare, pasi përndryshe të paktën një gjobë do e vendosnin ”.
Më tej Vasili shprehet se është e qartë si drita e diellit, që Edi Rama përfaqëson Ali Babën me 40 hajdutë ku në çdo institucion ka nga një hajdut.
Dokumentet e panumërta tregojnë qartë batërdinë në Dogana e megjithatë siç e shihni Edi Rama nuk lëviz gishtin se ka futur vetë dorën dhe krahun komplet atje. O SPAK, media ta ka lehtësuar krejt punën dhe ti ka nxjerrë dhe zbuluar dokumentet, që do duhet të zbuloje vete. Tani vepro ndaj hajduteve çfarë pret më.
