Ministri për Evropën dhe Punët e Jashtme, Igli Hasani, të martën do të zhvillojë një vizitë zyrtare në Zagreb, gjatë së cilës do të takohet me Ministrin e Punëve të Jashtme Gordan Grlić-Radman, si dhe do të zhvillojë takime me Presidentin, Zoran Milanović dhe Kryeministrin, Andrej Plenković. Në kuadër të kësaj vizite, ministri Hasani gjithashtu do të marrë pjesë në çeljen e ekspozitës fotografike “Shqiptarët në Kroaci”.
Kjo është vizita e parë zyrtare e Ministrit Hasani në Zagreb, shprehje e vullnetit të përbashkët për të thelluar dhe zgjeruar bashkëpunimin dypalësh, rajonal dhe më gjerë, në të gjitha fushat me interes të përbashkët, por edhe për të bashkërenduar përpjekjet tona për anëtarësimin sa më të afërt në familjen evropiane.
