TIRANË– Sekretari i Përgjithshëm i Partisë Socialiste Damian Gjiknuri nuk preferoi të komentonte akuzat e ngritura ndaj ish-ministrit Arben Ahmetaj në lidhje me inceneratorët dhe njohjen me pronarin e tyre të shpallur në kërkim nga SPAK dhe as mungesën e tij në festën e të majtëve. Duke folur në një konferencë për shtyp me gazetarët numri dy i socialistëve tha se ata nuk kanë mbajtur shënim se kush erdhi në festë dhe kush jo.
Damian Gjiknuri: Nuk mbajtëm shënim kush erdhi, kush nuk erdhi në festë. Ju e dini që ka një hetim. Nuk ka pse të komentoj akuzat që ngrihen. Në Shqipëri ka një tendencë që gjyqi të bëhet mediatik dhe publik, por procesi i vërtetë ligjor është në organet e drejtësisë. Është një organ që qeveria nuk e kontrollon, që ka marrë në përgjegjësi penale figura të larta. Ka vetëm një të vërtetë, që organet janë duke hetuar dhe rezervohem të mos bëj komente.
I pyetur nga gazetarët në lidhje me përzgjedhjen e Avokatit të Popullit dhe hedhjen poshtë të emrit të Ledio Brahos, Gjiknuri tha se Partia Socialiste po kërkon një kandidat konsensual. Ai hodhi poshtë dhe zërat se ka pasur një marrëveshje “të fshehtë” me grupin që mbështet Enkelejd Alibeajn.
Damian Gjiknuri: Është një spekulim që ka pasur një pazar siç e quajtën disa apo ka pasur një përpjekje për të bërë këmbim të votave të Dvoranit dhe Brahon për mbështetje si avokat popullit. Kjo nuk është e vërtetë. Unë në pozicionin tim në dijeninë që kam nuk kam pasur asnjë përpjekje të tillë. Kur vjen puna te avokati i popullit, ai konsiderohet si një figurë konsensuale. U gjykua nga diskutimet që u bënë që emri në fjalë është shumë i politizuar dhe është një zgjatim i PD në gjithë aktivitetin e saj. Mazhoranca do të eksploroje të gjitha mundësitë që të ketë pëlqyeshmërinë e opozitës shqiptare. Duhet të gjej një emër që është i përshtatshëm, njësoj si për presidentin. Është thjesht një përpjekje që bën palët rreth një emri që dështoi. Ne duhet të eksplorojmë rrugë të tjera që është i parapëlqyer nga PS. Qëndrimi është që personi në fjalë ka qenë i ekspozuar politikisht ka qenë një zgjatim juridik i PD dhe nuk mundet që institucioni i Avokatit të Popullit të kthehet në politik.
