SPANJË– Është përgjakur Krishtilindja në Spanjë. Një aksident tragjik i regjistruar mbrëmjen e djeshme në veriperëndim të Spanjës. Një autobus me 7 persona në bord u rrëzua në një lumë, për pasojë 3 prej pasagjerëve nuk mundën t’u shpëtonin plagëve duke humbur tragjikisht jetën.
Shoferi i autobusit dhe një pasagjer u shpëtuan dhe u dërguan në spital. Automjeti, i cili i përket kompanisë Monbus dhe ishte rrugës për në Pontevedra, në Galicia të Spanjës, doli nga një urë dhe ra në lumin Lérez të shtunën vonë.
Sipas mediave spanjolle aksidenti tragjik ka ndodhur rreth orës 21:19 dhe autoritetet u lajmëruan nga një kalimtar që po kalonte në rrugë, i cili kishte pikasur vetëm parmakët e dëmtuar por jo autobusin e rënë në ujë.
Kërkimi për personat e zhdukur u ndërpre përkohësisht në orët e para të mëngjesit për shkak të kushteve të pafavorshme dhe valëve të lumit, por rifilloi në orën 9:30 të mëngjesit të Krishtlindjeve. Shërbimet e urgjencës thanë se një person i katërt dyshohet se është zhdukur në aksident.
