KAMËZ– Detaje të reja janë zbardhur nga konflikti i ndodhur mbrëmjen e djeshme në një dasmë në Bathore. Bëhet me dije se në konflikt janë përfshirë dy kushërinj dhe shkaku i këtij sherri është bërë një borxh prej 500 eurosh. Si pasojë e përleshjes 4 persona përfunduan të plagosur në spital.
Mësohet se Hafuz Trocit i ka marrë 500 euro borxh kushëririt të tij Fatjon Luca dhe nuk ja ka kthyer. Sipas tij, ia kishte kërkuar disa herë por borxhliu nuk ia ka dhënë paratë. Konflikti i djeshëm ka nisur pasi autori dhe personat e tjerë kanë qenë në një dasmë. Kur dasma ka qenë në përfundim mësohet se Luca është afruar drejt tavolinës ku qëndronte Troci dhe e ka goditur në gjoks.
Në këtë moment në këtë konfortim fizik janë përfshirë dhe familjarët e Trocit dhe Lucës. Në pak sekonda gjithçka u kthye në një arenë përplasjesh. Si pasojë të katër përfunduan në spitalin Nënë Tereza me plagë në fytyrë. Blutë e Kamzës bëjnë me dije se kanë vënë në pranga autorin e ngjarjes Fatjon Luca ndërsa nënë hetim janë vënë tre personat e tjerë.
NJOFTIMI I POLICISË:
Më datë 25.12.2022, në Bathore, në lagjen nr. 6, gjatë një konflikti për motive të dobëta, shtetasi F. L., ka goditur me mjet prerës kushëririn e tij, shtetasin H. T. Gjatë konfliktit kanë marrë dëmtime të lehta dhe familjarët e dy palëve të konfliktit, shtetasit M. L., B. C., dhe një 15-vjeçar. Të dëmtuarit ndodhen në spital, jashtë rrezikut për jetën ndërsa autori i dyshuar është shoqëruar në komisariat. Grupi hetimor ndodhet në vendngjarje dhe po punon për sqarimin e rrethanave të konfliktit.
