Mediat më të mëdha ndërkombëtare i kanë bërë jehonë protestës së opozitës shqiptare.
Agjencia e njohur Reuters shkruan se opozita nisi mosbindjen civile.
Sipas saj, ndër të tjera, protestuesit kërkojnë lirimin e kreut të opozitës, Sali Berisha.
“Policia shqiptare hodhi gaz lotsjellës për të shpërndarë protestuesit e opozitës, që hodhën bomba me benzinë në ndërtesat qeveritare dhe thyen disa prona të qytetit në atë që ata thanë se ishte pjesë e një mosbindjeje civile kundër qeverisë.
Protestuesit akuzuan qeverinë e kryeministrit Edi Rama për korrupsion, nepotizëm dhe përpjekje për të mbyllur gojën e opozitës.
Ata protestuan gjithashtu kundër mbajtjes në arrest shtëpie të liderit të partisë opozitare Sali Berisha për akuzat e korrupsionit për veprimet që ai bëri kur ishte kryeministër. Berisha ka mohuar çdo shkelje,” raporton Reuters.
“Rama të japë dorëheqjen, të ikë, të shkojë në burg për gjithë jetën”, tha protestuesi Gjokë Dreshaj.
“Bashkohuni me ne, kjo është një mosbindje civile”, tha përmes altoparlantit një tjetër protestues, Erges Eskiu. “Të gjithë majtas e djathtas, pensionistë dhe studentë, prindër, të gjithë jeni të vjedhur”.
