TIRANË– Vrasja e Edmond Papës në zonë e Selitës vijon të jetë ende pa autor. Ndërkohë detaje të reja kanë dalë në dritë pas marrjes së dëshmisë të pronarit të lokalit ku ndodhi ngjarja e rëndë, kunatës së viktimës, e cila ka shkuar në vendngjarja direkt pas ngjarjes dhe vëllait të Edmond Papës. Para Policisë pronari i lokalit ku ndodhi atentati ka thënë se në momentin e të shtënave ka qenë në banak dhe kur ka dëgjuar krismat ka menduar që po plasin fishekzjarre. Më pas thotë më tej ka parë një person me kapuç dhe në këtë moment ka dalë nga banaku për te dera dhe në hyrje të lokalit ka parë viktimën e plagosur, i cili i ka kërkuar ndihmë.
Në këtë moment ai ka marrë në telefon policinë në numrin 129 por që sipas dëshmisë së dhënë i ka dalë sekretaria telefonike, pastaj ka tentuar sërish por përsëri e njëjta gjë. Më pas shprehet ai ka shkuar tek shtëpia e vëllait të viktimës ku i ka dalë e kunata dhe i ka treguar ngjarjen. Më pas të dy së bashku kanë shkuar tek lokali dhe me një peshqir janë munduar ti ndalojnë hemoragjinë. Kunata është munduar ta dërgojë vetë në spital, ka marrë dhe makinën e Edmondit por më pas ka ardhur ambulanca dhe e kanë marrë ata.
“Kam qenë brenda në lokal dhe isha në banak. Kam dëgjuar zhurmë dhe mendova ishin fishekzjarrë. Pashë një person me kapuç në kokë dhe pastaj dola nga banaku për te dera dhe në hyrje të lokalit kam parë viktimën, i cili me tha që ishte plagosur dhe të lajmëroja ambulancën. Ishte ora 16:25 dhe telefonova numrin 129 dhe më ka dalë sekretaria, i rashë dy herë. Nuk po më përgjigjeshin dhe shkova te banesa e vëllait të viktimës dhe aty doli kunata e viktimës dhe i kam thënë asaj që është plagosur kunati. U ktheva në lokal dhe hoqa xhupin dhe ia vendosa te koka viktimës dhe i vendosa një peshqir te plagët. Kunata e tij mori makinën për ta transportuar në spital pasi ambulanca nuk kishte ardhur akoma, më pas erdhi policia dhe pastaj ambulanca që e mori dhe çoi në spital”, tha ai në Polici.
Po ashtu kunata e viktimës ka deklaruar në polici se në momentin që ka ndodhur ngjarja ka dëgjuar krismat por ka menduar që kanë qenë fishekzhjarere. Ajo shprehet se para se të dilte viktima i ka thënë që të ushqejë nënën pasi për pak do e dërgonte në spital për të kryer vizitën mjekësore. Kunata e Edmond Papës para policisë është shprehur se kur pronari i lokalit ka shkuar në banesë ajo ka telefonuar ambulancën, më pas është bërë gati për ta dërguar vetë në spital por me ardhjen e ambulancës thotë ajo e morën ata.
“Në orën 10:00 në shtëpi kanë ardhur vjehrra së bashku me kunatin. Ata kanë ardhur në Tiranë me automjetin e kunatit tim, pasi do të kryenin disa vizita mjekësore të vjehrrës. Rreth orës 16:15, kunati më kërkoi që t’i jepja për të ngrënë vjehrrës, para se ta çonte për vizitë mjekësore. Kur isha duke i dhënë për të ngrënë vjehrrës dhe në ato momente dëgjova të shtëna. Kujtova se mos ishin fishekzjarrë, por më pas ra zilja e portës dhe ishte pronari i lokalit, ai më tha të lajmëroja ambulancën pasi ishte plagosur kunati im në lokalin e tij. Telefonova ambulancën dhe pastaj mora automjetin e kunatit tim për ta dërguar në spital, por më pas erdhi Policia dhe ambulanca që e mori”, tha ajo.
Dhe dëshmia e vëllait të viktimës nuk ka hedhur shumë dritë mbi ngjarjen. Para grupit hetimor ai ka thënë se i vëllai nuk ruhej nga ndonjë atentat dhe se ai nuk ka pasur konflikte me asnjë.
“Nuk kam parë asnjë shqetësim të vëllai dhe ai nuk ruhej, nuk ka pasur konflikte”, tha thënë vëllai i Edmond Papës.
Edmond Papa u ekzekutua të premten e 16 dhjetorit në një lokal në zonën e Selitës në Tiranë. Atentatori e kishte ruajtur dhe kontrolluar çdo lëvizje të viktimës gjatë ditës dhe ka pritur momentin e duhur për ta vrarë. 41-vjeçari kishte ardhur në Tiranë pasi do të vizitonte nënën në një spital. Kur ai është ulur në lokalin që ndodhet vetëm 50 metra larg shtëpisë së të vëllait autori ka hyrë brenda dhe ka qëlluar nëntë herë në drejtim të tij. Papa rezulton një person me precedentë penal pasi është dënuar në Greqi për trafik droge dhe po ashtu në Britani rezulton i skeduar po për këtë akuzë. Ai ishte pronar i disa bizneseve në Sarandë një ndër to hotel “Blu Sky”.
