‘Golden’ është një kompleks superluksoz në pronësi të Altin Hajrit dhe vëllait të tij, Emiliano.
Në këtë kompleks superluksoz dyshohet se u vra Jan Prenga më 17 janar të vitit 2020.
Çështja rikthehet edhe njëherë në vëmendje, pas arrestimit të ish-deputetit të PS, Jurgis Çyrbja mbrëmjen e 20 tetorit në Durrës.
Ky i fundit dyshohet se ka strehuar Altin Hajrin në banesën e tij, si edhe në banesa të tjera, pas vrasjes së Jan Prengës. Hajri rezulton në kërkim prej 4 vitesh dhe as në kontrollet e djeshme që ushtroi policia dhe agjentët e BKH nuk u gjet.
Pas një hetimi të gjatë dhe nga përgjigjet e autoriteteve franceze u zbulua se gjatë kohës që Ccybrja ishte deputet, ai ishte përdorues i aplikacionit Sky dhe se ka të dhëna sekrete se ka bashkëpunuar me personazhe të një grupi kriminal në Durrës.
Kujtojmë se në shtator të këtij viti, Gjykata e Posaçme vendosi kalimin për gjykim të çështjes në ngarkim të Altin Hajrit. Ky i fundit akuzohet për rrëmbimin dhe zhdukjen e Jan Prengës, më 17 janar të vitit 2020. Hajri është gjykuar në mungesë, pasi nuk ishte bërë e mundur gjetja e tij, bashkë me Gramoz Rexhepin dhe Dritan Funiqin, të tre të cilësuar si organizatorë të rrëmbimit, me motiv konfliktet për shkak të grabitjes së një sasie me 260 kg kokainë në Angli, nga vëllai i Janit.
Trupi i këtij të fundit nuk është gjendur ende dhe cilësohet i vdekur, pasi dyshohet se u torturua për vdekje në ambientet e kompleksit ‘Golden’ pas rrëmbimit dhe më pas trupi u zhduk. Kompleksi është në pronësi të familjes Hajri.
