TIRANË– Greva e urisë e invalidëve në Elbasan ka përfunduar. Kjo pasi mbrëmjen e sotme grevistët kanë arritur një marrëveshje me Ministrinë e Shëndetësisë. Bëhet me dije se zëvendësministrja e Shëndetësisë ka takuar grevistët dhe u ka premtuar atyre se brenda ditëve të fundit të këtij viti atyre do t’u vijnë të gjitha paratë që kërkojnë, ndërsa u janë krijuar edhe lehtësira të tjera.
Ata kanë njoftuar se nesër në orën 09:10 do të flasin për mediat lidhur me marrëveshjen pasi ende nuk dihen detaje dhe kushtet e akordit që kanë rënë.
Ata prej ditësh kanë protestuar derisa morën dhe vendimin për tu futur në grevëurie pasi kërkesat e tyre binin në vesh të shurdhër. Protestat e tyre erdhën pasi KEMP epror iu hoqi paketën higjieno-sanitare 10 mijë lekë. Invalidët merrnin një pagesë prej 40 mijë lekë në muaj, por me heqjen e paketës higjieno-sanitare tashmë ata marrin 24 mijë lek në muaj. Ndarja e pagesës bëhet 12 mijë lekë në muaj për paaftësinë për të punuar, 10 mijë lekë shkojnë për shoqëruesin dhe 2 mijë lekë për pagesën e dritave.
