Agjencia e Mbikëqyrjes Policore po hesht, lidhur me denoncimin e një shtetasi shqiptaro-amerikan për dhunë të ushtruar ndaj tij, në zyrat e Policisë Rrugore në Drejtorinë Vendore të Policisë Shkodër.
Edhe pse ka sjellë raportin mjeko-ligjor nga Urgjenca e Spitalit Rajonal të Shkodrës, ku konstatohet dhuna ndaj shtetasit me iniciale T. P, AMP nuk ka marrë asnjë mase për punonjësin e Policisë, Rrok Frroku për dhunën që ka ushtruar ndaj qytetarit.
Në denoncimin e bërë në redaksinë e Syri.Net, shtetasi shqiptaro-amerikan, T. P thotë se që prej dy javësh, AMP nuk ka dhënë asnjë përgjigje.
Bashkangjitur denoncimit, T. P ka vënë në dispozicion të redaksisë së Syri.Net edhe dokumentet, që kanë të bëjnë me denocnimin dhe raportin mjeko-ligjor, i lëshuar nga Urgjenca e Spitalit të Shkodrës.
Nga raporti mjekësor, rezulton se T. P është goditur në pjesën fundore të shpinës, për shkak të dhunës së ushtruar ndaj tij.
Shqiptaro-amerikani në denoncimin e tij thotë se ngjarja e dhunimit nga ana e punonjësit të Policisë Rrugore në Shkodër ka ndodhur më 18 tetor të këtij viti, rreth orës 23.30 të mbrëmjes, ku Nënkomisar Rrok Frroku, e ka goditur në pjesën fundore të shpinës dhe e ka kapur për fyti.
