Qeveria ka paraqitur në parlament projektbuxhetin për vitin e ardhshëm, i cili edhe pse rritet në vlerë me 500 milionë euro krahasuar me këtë vit, nuk jep para për rritjen e pensioneve, përveç indeksimit dhe bonusit të fundvitit.
Niveli i ulët i pensioneve që marrin të moshuarit në Shqipëri është shndërruar në një nga çështjet më të nxehta të debatit publik. Të dhënat zyrtare nga Eurostat, tregojnë se aktualisht një pensionist shqiptar përfiton rreth 2 herë më pak pension se sa fqinjët.
Aktualisht pagesa mesatare e pensionit në Shqipëri luhatet rreth 131 euro në muaj. Në vendet fqinje të rajonit pensionet janë minimalisht dy herë më të larta se në Shqipëri. Në Bosnje, pensionistët paguhen 237 euro në muaj. Në Serbi ata përfitojnë 276 euro në muaj, ndërsa në Malin e Zi pagesa mesatare mujore për pensionist është 291 euro.
Megjithatë këto janë vetëm shifrat absolute. Diskriminimi real i pensionistëve shqiptarë është shumë më i madh nëse matet sipas fuqisë reale blerëse që u garanton pensioni i tyre.
