Anëtarja e Këshillit Bashkiak të opozitës, Ilda Zhulali gjatë fjalës së mbajtur në protestën para bashkisë së Tiranës ku kërkohet dorëheqja e kryebashkiakut, ka sfiduar drejtoreshën e Agjencisë së Mbrojtjes së Mjedisit dhe Erion Veliajn për pastërtinë e liqenit të Tiranës.
Zhulali deklaroi se, Erion Veliaj nuk ka lënë asnjë punë të madhe Tiranës, edhe pse ka shpenzuar 2 miliardë euro gjatë mandateve të tij në krye të bashkisë.
‘A e dini që në 9 vite në drejtimin e bashkisë së Tiranës, ka administruar një buxhet prej 2 miliardë eurosh, që janë marrë nga taksat që janë shumëfishuar.
Ku kanë shkuar këto para?
Cilat janë punët e mëdha që Erion Veliaj që i ka dhënë këtij qyteti, punët e mëdha që i ka lënë trashëgimin brezave të ardhshëm.
Vetëm 2 nga 10 familje në Tiranë mund ti çojnë fëmijët në çerdhe dhe kopshte publike, 8 familje të tjera i çojnë në privat. Edhe ju policë kështu duhet ta shikoni.
A e keni parë skandalin më të fundit në bashkinë e Tiranës.
Shkoni pak atje ku është mushkëria e qytetit, tek parku i liqenit. Shkoni çfarë ndodh, shikohet me sy të lirë se si është ndotur liqeni sepse aty derdhen të gjithë ujërat e zeza. Aty nuk kalon dot sepse mban erë të tmerrshme.
Por dje na doli në mbrojtje të Veliajt, Agjencia e Mbrojtjes së Mjedisit, tha jo, liqeni është i pastër. Mirë që nuk paska sy, po hundë kanë këta kur kalojnë aty.
Meqë jemi këtu, i sfidojmë publikisht drejtoreshën dhe Veliajn të vijnë e të lahen tek liqeni i Tiranës dhe ne do të jemi aty, do ti filmojmë se sa mirë, pastër dhe bukur është liqeni’, tha Ilda Zhulali gjatë fjalës së saj në protestën para bashkisë së Tiranës, ku kërkohet largimi i Erion Veliajt.
