I pyetur nga gazetarët në lidhje me zgjedhjet në SHBA që ditën e votimit e kanë nesër, kryetari i PD-së, Sali Berisha deklaroi se, nuk ndërhyjnë në fushatën elektorale që po vazhdon. Gjatë fjalës së tij, Berisha theksoi se nuk u beson shumë sondazheve.
Pjesë nga fjala e kreut të PD, Sali Berisha:
Së pari, kam kërkuar anëtarëve të PD dhe mbështetësve të votojnë Partinë Republikane, kandidatët e saj, sepse jemi të alinjuar me këtë parti në Unionin Demokrat Ndërkombëtar.
Përndryshe, ne nuk ndërhyjmë në fushatën elektorale të SHBA.
Dhe kjo nuk është ndërhyrje, kjo është një respektim i detyrimeve që rrjedhin, të themi detyrimeve ndërkombëtare nga asociacioni ndërkombëtar i PD.
Tani, se kush do të fitojë, së pari duhet të pranoj që nuk jam një parashikues i mirë në këto pollet e zgjedhjeve.
Por me ato që kam lexuar, e vërteta është se pavarësisht se dy kampet ndjehen si fitimtarë, nuk mund të them se kush mund t’i fitojë zgjedhjet, por shpreh bindjen se në këto zgjedhje do fitojnë qytetarët amerikanë dhe janë zgjedhje të rëndësishme jo vetëm për SHBA, por për mbarë botën.
Të presim, 24 orë na ndajnë nga mëngjesi i votimit, megjithëse kanë votuar 70 milionë ose më shumë, çka nuk është parë ndonjëherë.
Këto janë qëndrimet, nuk mund të them se kush mund të fitojë, sepse edhe po të ishin pollet me diferencë, natyrisht unë nuk kam besim tek pollet.
Nuk e di, e kam një problem, se këtu në Shqipëri falsifikohen shumë pollet.
Ju e patë besoj, çfarë nxjerrin pollet Ramën, në pollin dal-vivo, ju e patë se si u shakullos.
Tani, më thoni ju mua, çfarë të besoj unë? Të besoj qytetarët apo pollet?
Pra, janë tjetër qytetarët, tjetër janë pollet.
