Pas arrestimit të tij në datë 21 tetor, ish-deputeti socialist Jurgis Çyrbja është thirrur sot në SPAK për t’u marrë në pyetje nga prokurori Adnan Xholi.
Organi i akuzës ka ngritur tre akuza ndaj Çyrbjas, konkretisht “tregimi i sekretit shtetëror nga shtetasit”, kryer më tepër se një herë, “përkrahja e autorit të krimit”, kryer më tepër se një herë si dhe për “korrupsion aktiv në zgjedhje”.
Çyrbja akuzohet se informonte Altin Hajrin dhe persona të tjerë që kërkohen nga autoritetet shqiptare, në këmbim ata mblidhnin vota për të.
Madje krimi ndikoi që ai të vendosej lart në listën fituese të PS.
Për të njejtën çështje, me urdhër të SPAK u arrestua edhe Ahmet Masha, ndërsa është shpallur në kërkim Altin Hajri, i cili po gjykohet në GJKKO për rrëmbimin dhe zhdukjen e Jan Prengës.
Në seancat e mbajtuara në GJKKO, Jurgis Çyrbja ka mbajtur qendrim mohues si përdorues i aplikacionit SKY ECC.
