Napoli fitoi dje përballë Atalantës me rezultatin 2-3. Kjo fitore me vlerë përballë pretendentëve për titullin, i jep besim djemve të Kontes që mbajnë kreun e Seria A.
Pas ndeshjes foli Amir Rrahmani, që spikati me paraqitjen e tij në mbrojtje. Mbrojtësi i përfaqësueses së Kosovës qëndroi modest, teksa tha se për titullin duhet përulësi dhe sakrifica.
“Ishte një ndeshje e ekuilibruar për mendimin tim. Është bukur të shohësh kaq shumë gola nga jashtë, por është e vështirë në fushë sepse Atalanta krijon kaq shumë raste, ata bëjnë presing të lartë, kanë lojtarë të nivelit të lartë. Ne ishim mirë kur bënim presion, kur u tërhoqëm ishim në telashe sepse shumë njerëz hynin në zonë kur erdhën krosimet. Por ne ia dolëm dhe fituam.
Që në fillim kemi thënë që çdo ndeshje që fitojmë duhet të festojmë dhe që në fillim ishte kështu. Pas ndeshjes së parë që humbëm, të gjitha ndeshjet e tjera kur filluam të fitonim, festuam. Edhe sot festuam dhe pastaj nga e hëna duhet të mendojmë për ndeshjen e radhës.
Unë komandant i mbrojtjes? Unë them gjithmonë, e kam përsëritur shumë herë, se sekreti është i gjithë ekipi. Kur gjërat shkojnë mirë, ekipi mbrohet i gjithi. Është shumë e lehtë për ne dhe ndihemi më të sigurt kur të tjerët bëjnë presion përpara, kur mbërrin një top jo i pastër për sulmuesit. Kështu që për ne është më e lehtë kur skuadra ecën mirë, është shumë më e lehtë edhe për ne mbrojtësit.
Ngjashmëri me vitin e titullit? Vitin e kampionit kishim shumë më shumë pikë se të tjerët dhe kishim një avantazh të madh. Këtë vit ka edhe ekipe të tjera që po fitojnë, për këtë do të jetë shumë e vështirë deri në fund, sepse na duhet vazhdimësi dhe na duhet fitore, përulësi dhe sakrifica”, u shpreh Rrahmani.
