Kevin Dodaj po shkëlqen me Vllazninë dhe është kthyer në një nga talentet më premtues të futbollit shqiptar.
19-vjeçari ka tërhequr interesimin e disa klubeve, dhe sipas presidentit të Vllaznisë, Alban Xhaferi, për të ka pasur oferta konkrete nga Ukraina dhe Bullgaria.
Në një intervistë për emisionin “Max Sport” në Euronews Albania, Xhaferi ka zbuluar gjithashtu se klubi ka qenë në diskutime me Lens, ekipin francez që renditet i 6-ti në Ligue 1.
Presidenti i Vllaznisë shpreh dëshirën që Dodaj të luajë në një nga pesë ligat më të forta të Europës, por duke fituar më parë një trofe me Vllazninë.
“Unë dua që Dodaj të konsolidohet edhe pak në kampionatin tonë dhe të fitojmë një trofe me të. Ka një të ardhme fantastike dhe mendoj se vendi i tij është në një nga ligat kryesore të Europës. Kemi pasur diskutime me Lens, por jo një ofertë konkrete. Dodaj është në vëmendjen e këtyre kampionateve të mëdha, ndërsa ofertat konkrete kanë ardhur nga Ukraina dhe Bullgaria. Megjithatë, do të kisha preferuar ta shihja atë në një nga top 5 ligat europiane”, është shprehur Xhaferi.
