Ditën e djeshme, përfaqësues të Partisë Demokratike si, Drejtuesja Politike për Diasporën, Jozefina Topalli, Zëdhënësja e Partisë Demokratike, Floriana Garo, Kryetari i Bashkisë Kavajë, Fisnik Qosja dhe anëtari i Këshillit Kombëtar, Shkëlqim Hoxha, zhvilluan një takim madhështor me shqiptarët në Rutigliano të Italisë, në kuadër të zgjedhjeve të përgjithshme të 11 majit.
Për shkak të pjesëmarrjes së lartë, takimi u zhvillua në ambientet e jashtme, ku më shumë se 1000 shqiptarë morën pjesë dhe shprehen mbështetje për planin e Partisë Demokratike. Gjatë takimit, u theksua rëndësia e regjistrimit të diasporës për të votuar dhe ndikimi i këtij procesi në zhvillimin e vendit.
Gjithashtu, u prezantua plani i qeverisjes së Partisë Demokratike, i cili synon të përmirësojë ekonominë dhe mirëqenien e qytetarëve. Disa nga pikat kryesore përfshijnë rritjen e rrogës minimale në 500 euro, një rrogë mesatare prej 1200 eurosh, si dhe një “minimum jetik” prej 200 euro për çdo familje. Po ashtu, u bë e ditur se do të rivendoset taksa e sheshtë dhe do të ofrohen subvencione për sektorin bujqësor, për të mbështetur zhvillimin e tij.
Një tjetër nismë e rëndësishme që u prezantua ishte mbështetja për ata që duan të kthehen, të investojnë dhe të hapin biznese në Shqipëri, pasi për ta do të aplikohet një periudhë 5-vjeçare me zero taksa. Po ashtu, do të krijohet “Karta e Konsumatorit”, që do të ndihmojë qytetarët të kenë akses në produkte me çmime më të ulëta.
Në përfundim, u bë thirrje për mobilizim të plotë të diasporës për t’u regjistruar dhe për të votuar në zgjedhjet e 11 majit, duke theksuar se çdo votë ka rëndësi për të sjellë ndryshime pozitive dhe për të kontribuar në përmirësimin e kushteve të jetesës dhe zhvillimin ekonomik të Shqipërisë.
