TIRANË– Nuk ka zgjatur shumë “bashkimi” mes deputetëve të Partisë Demokratike. Kështu pa kaluar shumë nga dreka mes një pjesë deputetësh demokratë, të cilët i bëri bashkë një ftesë e kolegut të tyre Xhelal Mziu për festa ka ardhur reagimi i Gazment Bardhit, i cili në një postim në Facebook shkruan se ajo drekë u keqpërdor. Bardhi shkruan se dreka me ftesë të deputetit Xhelal Mziu, nuk nuk përbën asnjë fillim të vjetër apo të ri dhe nuk kishte asnjë mesazh politik. Në fund, ai bën urimin për festat e fundvitit.
“Keqpërdorimi për qëllime politike i një dreke miqësore të organizuar nga kolegu Xhelal Mziu me rastin e festave të fundviti është akt dëshpërimi. Në vaki, festa, apo dasma, të ftuarit nuk zgjedhin dot njëri tjetrin. Ky nuk përbën asnjë fillim të vjetër apo të ri dhe dreka e sotme nuk kishte asnjë mesazh politik! Faleminderit kolegut Mziu për ftesën dhe Gëzuar Festat!”, shkruan Bardhi.
Reagimi i Bardhit vjen pasi vetë kryedemokrati Sali Berisha pak më parë postoi një foto nga dreka në rrjetin social Facebook ku shkruante se ajo drekë ishte dhe si një fillim i ri për Grupin Parlamentar të PD-së.
