Banka e Shqipërisë ka vendosur të ndryshojë kushtet e dhënies së kredive për blerje banesash, duke vendosur kufizime të reja për qytetarët që kërkojnë hua. Deri më tani, bankat ofronin mundësinë për të financuar deri në 100% të vlerës së apartamentit, por kjo praktikë do të marrë fund. Sipas vendimit të ri, kredia për një shtëpi të parë në lekë do të jetë deri në 85% të vlerës, ndërsa për një shtëpi të dytë, maksimumi do të jetë 80%. Për kreditë në valutë të huaj, kufiri ulet edhe më shumë: 75% për shtëpinë e parë dhe 70% për të dytën. Guvernatori Gent Sejko shpjegoi se këto masa merren për të shmangur rreziqet që lidhen me luhatjet e kursit të këmbimit.
Gjatë prezantimit të vendimeve, Sejko komentoi edhe ecurinë ekonomike të tremujorit të parë të vitit 2025, duke theksuar se ajo ka ruajtur të njëjtin ritëm si në vitin e kaluar, pa ndryshime të ndjeshme në rritje.
