Një ngjarje e rëndë ndodhi gjatë etapës së parë të “Giro d’Italia” që u zhvillua në Shqipëri. Çiklisti i njohur spanjoll, Mikel Landa, 35 vjeç, pësoi një aksident të rëndë pranë zonës së Freskut në Tiranë, vetëm pak kilometra para përfundimit të etapës. Ai u përplas me një shtyllë në një kthesë të rrezikshme dhe ra me forcë në trotuar, duke pësuar një dëmtim serioz në shpinë.
Pas rrëzimit, Landa nuk mundi të lëvizte dhe u transportua menjëherë me ambulancë drejt spitalit. Mjekët kanë konfirmuar se ai ka pësuar një frakturë në vertebrën T11 të shtyllës kurrizore dhe do të qëndrojë për disa kohë në spital, në një pozicion të posaçëm, përpara se të nisë riaftësimi. Skuadra e tij “Soudal-Quick Step” ka bërë të ditur se gjendja e tij është e vështirë dhe po shqyrtohen mundësitë për rikthimin e tij në Spanjë, në konsultim me mjekët specialistë.
