Edmond Përbashaj, i njohur si “Mondi”, është kthyer në një nga figurat më problematike për autoritetet greke, pasi edhe pse ndodhet pas hekurave, vazhdon të drejtojë rrjetin e tij kriminal nga brenda burgut.
Gjatë një kontrolli të befasishëm në qelinë e tij, policia greke zbuloi një telefon celular, një router portativ dhe një shufër metalike – të gjitha dëshmi që tregojnë se ai ruan lidhjet me botën e jashtme dhe vijon të organizojë aktivitetet e paligjshme.
“Mondi nuk njeh pengesa. Edhe në izolim do të sigurojë një celular dhe drogë,” – tha një zyrtar i lartë i autoriteteve greke, i njohur ndryshe si “FBI-ja greke”.
Përbashaj dyshohet se ka ngritur një sistem të tërë bashkëpunëtorësh brenda burgjeve të Janinës, duke përfshirë edhe zyrtarë të burgut, të cilët i paguante për të lehtësuar kontrabandën e drogës dhe për të pastruar para përmes mensës së burgut.
Aktualisht i burgosur në Nafplio, ai mendohet se ka përsëritur të njëjtin model kriminal, duke drejtuar nga qelia një rrjet të strukturuar që përfshin dhjetëra shqiptarë të përfshirë në trafik droge, shpërthime me lëndë plasëse dhe vrasje me pagesë.
Emri i “Mondit” është i lidhur edhe me vrasjen e një shtetasi shqiptar pak muaj më parë në Thrakomedones, si dhe me disa ngjarje të tjera të rënda kriminale që kanë tronditur Greqinë.
Telefonat dhe pajisjet teknologjike të sekuestruara në qelinë e tij janë dërguar për ekspertizë, në përpjekje për të zbuluar bashkëpunëtorët dhe urdhërat kriminalë që dyshohet se janë dhënë nga brenda burgut.
Një tjetër çështje penale është hapur kundër tij, ndërsa hetimet vazhdojnë dhe pritet që ai të dalë sërish para gjykatës në muajt e ardhshëm.
