Një ngjarje e rëndë me elementë diskriminimi ka ndodhur në fshatin Katjel të Prrenjasit, ku familjes së një 63-vjeçareje nga komuniteti egjiptian iu mohua e drejta për ta varrosur të afërmen e tyre.
Sipas raportimeve, kryeplaku i fshatit, Enver Muça, është kallëzuar në polici pasi dyshohet se, me mbështetjen e pleqësisë dhe një pjese të komunitetit, ka refuzuar lejen për varrimin e të ndjerës Sofie Doda, me arsyetimin se familja e saj nuk është “autoktone”.
Për dy ditë me radhë, familjarët u përballën me pengesa të rënda, duke mos pasur mundësinë të kryejnë ceremoninë mortore. Ngjarja ka ngjallur reagime të forta dhe ka rikthyer në vëmendje problematikat që lidhen me diskriminimin ndaj pakicave etnike në zonat rurale.
Organizata “Drejtësi Sociale”, përmes avokatit Gentian Serjani, ka dorëzuar një kallëzim penal ndaj kryeplakut në Prokurorinë pranë Gjykatës së Elbasanit, duke e akuzuar atë për shkelje të të drejtave të barabarta dhe diskriminim etnik – në kundërshtim me ligjet në fuqi dhe Kushtetutën.
Rasti ka hapur diskutime më të gjera për trajtimin e komuniteteve të margjinalizuara dhe nevojën për respektimin e dinjitetit njerëzor, pa përjashtime dhe pa paragjykime.
