Në një nga momentet më të veçanta të ditës së zgjedhjeve parlamentare në Tiranë, gazetarja dhe aktivistja politike Valbona Mhilli ka tërhequr vëmendjen me një gjest simbolik dhe të guximshëm. Ajo është paraqitur në Qendrën e Votimit duke mbajtur veshur një bluzë të bardhë me mbishkrimin “Ervin Salianji”, në shenjë mbështetjeje për deputetin demokrat.
Ervin Salianji është një i dënuar politik. Ai ndodhet në burg për shkak të qëndrimeve dhe angazhimit të tij si zë i fortë i opozitës dhe i denoncimeve ndaj aferave korruptive. Sot ai ushtroi të drejtën e votës nga Burgu i Fierit, duke dëshmuar se zëri i tij mbetet aktiv edhe nga qelia.
Valbona Mhilli, përveç angazhimit të saj si gazetare, është një zë aktiv në politikë. Me këtë veprim publik, ajo ka përcjellë një mesazh të fortë solidariteti dhe mbështetjeje ndaj Salianjit, duke theksuar se drejtësia nuk mund të heshtë zërat që denoncojnë të keqen.
Ky moment u prit me interes dhe vlerësim nga qytetarë dhe përfaqësues të opozitës, duke sjellë një atmosferë më njerëzore dhe të ndershme në këtë ditë vendimtare për vendin.
