Eksperti i turizmit Isa Krasniqi ka deklaruar se Shqipëria po përjeton një rritje të ndjeshme të turizmit, falë promovimit të vazhdueshëm dhe investimeve strategjike në infrastrukturë. Ai theksoi se këtë vit pritet që vendin ta vizitojnë mbi 14 milionë turistë.
“Shqipëria po përmendet nga media ndërkombëtare shumë të njohura, çka tregon për një përmirësim të dukshëm të imazhit të saj jashtë vendit,” u shpreh ai.
Krasniqi vlerësoi ndikimin që do të ketë Aeroporti i Vlorës, i cili pritet të hapë linja të reja ajrore dhe të nxisë rritjen e fluksit turistik. Një tjetër risi këtë sezon është edhe shtimi i turistëve nga Azia dhe Indonezia, duke e zgjeruar ndjeshëm hartën e vendeve nga vijnë vizitorët.
Ai veçoi zonat si Vlora, Himara, Gjirokastra dhe Saranda si destinacione me potencial të lartë zhvillimi ekonomik përmes turizmit.
“Shqipëria ka shumë për të ofruar — nga dy dete e natyrë e rrallë, deri te hotelet dhe resortet me çmime konkurruese,” përfundoi eksperti.
