Stambolli mikpret bisedimet Ukrainë–Rusi, por pa përparim konkret

Në Stamboll u zhvillua një takim mes delegacioneve të Ukrainës dhe Rusisë, por pa rezultate të prekshme. Rusia deklaroi se është e kënaqur me rrjedhën e bisedimeve, ndërsa Ukraina i cilësoi kërkesat ruse si “të papranueshme”.

Një nga pak pikët ku palët ranë dakord ishte shkëmbimi i 1000 robërve të luftës nga secila palë – një marrëveshje që do të ishte më e madhja e këtij lloji deri më sot.

Megjithatë, propozimi i Ukrainës për një armëpushim 30-ditor gjatë zhvillimit të negociatave u refuzua nga Moska, që kërkon të negociojë pa parakushte dhe pa ndërprerje të luftës.

Presidenti rus Putin nuk mori pjesë personalisht në takim, pavarësisht ftesës së presidentit Zelensky dhe sugjerimeve të ndërkombëtarëve. Bisedimet u zhvilluan në një nivel më të ulët diplomatik.

Turqia, që ruan lidhje të mira me të dyja palët dhe nuk ka vendosur sanksione ndaj Rusisë, ofroi edhe një herë rolin e ndërmjetësit. Ajo është gjithashtu furnizues i rëndësishëm i Ukrainës me dronë strategjikë.

Kievi kërkon tërheqjen e trupave ruse dhe garanci ndërkombëtare për pavarësinë dhe sigurinë e tij. Ndërkohë, Moska vijon të insistojë në kërkesat e saj: që Ukraina të heqë dorë nga anëtarësimi në NATO, të çarmatoset dhe të pranojë humbjen e territoreve të pushtuara.