Sot në Vatikan mbahet ceremonia zyrtare e përurimit të Papës së ri, Leoni XIV, i cili nis misionin e tij si kreu i Selisë së Shenjtë. Roma është vënë në një regjim të rreptë sigurie, ndërsa pritet të mbërrijnë 156 delegacione nga vende të ndryshme të botës, si dhe më shumë se 250 mijë besimtarë që do të mbushin Sheshin e Shën Pjetrit për të ndjekur nga afër këtë ngjarje historike për botën katolike.
Në mesin e figurave të njohura që do të marrin pjesë në këtë ceremoni madhështore janë zëvendëspresidenti i Shteteve të Bashkuara, JD Vance, dhe Sekretari i Shtetit amerikan, Marco Rubio. Gjithashtu, do të jetë i pranishëm edhe Presidenti i Ukrainës, Volodymyr Zelensky, ndërsa Federata Ruse do të përfaqësohet nga Ministrja e Kulturës, Olga Liubimova.
Edhe Shqipëria do të ketë një përfaqësim të nivelit të lartë në këtë ceremoni. Delegacioni shqiptar përbëhet nga Presidenti i Republikës, Bajram Begaj, Ministri për Evropën dhe Punët e Jashtme, Igli Hasani, si dhe përfaqësues të komuniteteve fetare në vend. Ceremonia e përurimit pritet të nisë në orën 10:00 me orën lokale.
