Katër zyrtarë janë arrestuar pas hetimeve disa mujore nga Agjencia e Mbikëqyrjes Policore, në lidhje me një ngjarje të ndodhur më 17 shtator 2023 në Pikën Kufitare “Hani i Hotit”.
Tre punonjës policie dhe një doganier akuzohen për “shpërdorim detyre”, pasi dyshohet se kanë lejuar kalimin e një kamioni me 442 kilogramë kanabis drejt Malit të Zi, duke shkelur procedurat standarde të kontrollit kufitar.
Kamioni me targa shqiptare u ndal nga autoritetet malazeze në Pikën e Kalimit Kufitar “Bozaj”, ku pas kontrollit u zbulua sasia e madhe e lëndës narkotike “Cannabis Sativa”.
Të ndaluarit janë:
- Lekë Çerkezi – punonjës policie në PKK “Hani i Hotit”
- Fatjon Hamzi – punonjës policie në PKK “Hani i Hotit”
- Tonin Melaj – punonjës policie në PKK “Hani i Hotit”
- Selami Ethemi – doganier në PKK “Hani i Hotit”
Operacioni është zhvilluar nga AMP (Rajoni Shkodër-Lezhë) në bashkëpunim të ngushtë me Drejtorinë e Hetimit Doganor dhe Prokurorinë pranë Gjykatës së Shkallës së Parë të Juridiksionit të Përgjithshëm Shkodër.
Hetimet e thelluara, të mbështetura edhe me metoda speciale të përgjimeve dhe vëzhgimeve, zbuluan mënyrën se si zyrtarët në pikën kufitare “Hani i Hotit” kishin lehtësuar kalimin e mjetit me drogë. Sipas të dhënave zyrtare, procedurat standarde të kontrollit doganor dhe policor janë anashkaluar në mënyrë të qëllimshme, duke i hapur rrugë trafikimit ndërkombëtar të lëndës narkotike.
Zyrtarët e ndaluar ndodhen aktualisht në ambjentet e paraburgimit, në pritje të masës së sigurisë nga Gjykata. Ndërkohë, AMP ka bërë me dije se hetimet do të vijojnë për të identifikuar çdo person tjetër të përfshirë në këtë rrjet të mundshëm trafikimi.
Ngjarja ka shkaktuar reagim të fortë në opinionin publik, duke rikthyer vëmendjen tek pasiguria në pikat kufitare dhe roli i zyrtarëve shtetërorë në mbështetje të aktiviteteve kriminale.
