Besnik Çerekja, i njohur edhe si avokat i Shkëlzen Berishës, rezulton pjesë e dosjes së zhvatjes 20-vjeçare të pasurisë nëntokësore shqiptare nga kompania Bankers, në bashkëpunim me politikanë dhe oligarkë. Pedagogu i Fakultetit të Drejtësisë, gjatë periudhës 2020-2025, ka marrë rreth 4.4 milionë euro nga komapania Bankers, me faturime të dyshuara si fiktive dhe për shërbime vetëm në letër, ku më pas Prokuroria dyshon se është angazhuar në pastrimin e parave përmes investimit në pasuri të paluajtshme, duke u fshehur pas bashkëshortes Eridona Çerekja.
Avokati Besnik Çerekja i ka përfituar paratë përmes studios së tij ligjore Studio Legale Cerekja shpk dhe Besnik Cerekja PF. Rreth 2.8 milionë euro i ka përfituar përmes subjektit ‘Besnik Cerekja PF’ me dy punonjës.
Avokati Bensik Çerekja dyshohet se paratë që ka përfituar nga Bankers në mënyrë të kundraligjshme i ka pastruar, duke i investuar në pasuri të paluajtshme, duke angazhuar bashkëshorten e tij, Eridona Çerekja (Sulaj).
(Bashkëshortët Besnik dhe Eridona Çerekja (Sulaj)
Teksa përfitonte para nga Bankersi me fatura fiktive përmes Studio Legale Cerekja shpk, me pronare në letra Eridona Çerekja, Besnik Çerekja ka themeluar në prill 2023 kompaninë e pasurive të paluajtshme VPM-Vlora Property Management, përmes të cilës dyshohet se ka pastruar miliona euro, gjithnjë duke u fshehur pas bashkëshortes.
Kompania e dyshimtë VPM-Vlora Property Management është në pronësi të Studio Legale Cerekja shpk me pronare në letra Eridona Çerekja, bashkëshortja e Besnik Çerekjas. Për të qarkulluar dhe devijuar miliona euro të përfituara nga Bankers, avokati fshihet pas bashkëshortes dhe shtetasit Klodian Meta, të cilit i ka besuar administrimin e VPM-Vlora Property Management.
Dyshimet për një aferë korruptive dhe pastrim parash shtohen kur nga hetimi i Prokurorisë Fier rezulton se është tentuar të zhdukeshin dokumentet e përfitimit të parave nga avoktati Besnik Çerekja. Zhdukja e faturimeve fiktive nga Bankers, për të mbuluar vjedhjet, është një praktikë e zakonshme, bashkë me manipulimin e shpenzimeve dhe bilanceve. Por, dokumentet e përfitimit të avokatit Besnik Çerekja janë zhdukur nga raportet kontrollit të AKBN-së ndaj Bankersit.
Angazhimi për zhdukjen e dokumeteve të abuzimit me qëllim për të mbuluar përfituesit nga një institucion publik si AKBN-ja, tregon se deri ku arrin zinxhiri korruptiv. Duket e çuditshme se pse Prokuroria e Fierit, me gjithë këto fakte penale korrupsioni dhe pastrimi parash, nuk referon dosjen për kompetencë në SPAK.
Jo vetëm kaq. Por, prokuroria ka lënë jashtë përgjegjësisë penale mbi 50 personazhe si deputetë, ish ministra, ish drejtorë dhe oligarkë, të cilët kanë përfituar dhjetëra milionë euro nga Bankers me fatura fiktive, duke pastruar më pas paratë përmes investimit në pasuri të paluajtshme.
