TIRANË– Teksa kandidati i koalicionit “Bashkë Fitojmë” për Tiranën, Belind Këlliçi tha se do të uronte Erion Veliajn nëse ai humbte, ky i fundit ka zbuluar detajet. Në një komunikim për NeWs24, Veliaj, pasi fitoi bindshëm në Tiranë një tjetër mandat, tha se nuk kishte marrë ende një mesazh urimi nga Këlliçi, ndërsa shtoi se pret që të bashkëpunojë me të apo dhe kandidatët e tjerë që garuan për bashkinë e Tiranën.
“Mesazh urimi nuk kam marrë. Kam marrë një mesazh që e keni marrë të gjithë: “A je i mërzitur, a të ka ardhur në majë të hundës?” Përgjigjja ime është: “Jo, në fakt nuk jam i mërzitur dhe më ka ardhur në majë të hundës me shumë bllokime që ata kanë bërë, por nuk jam i mërzitur”. Kështu që, ky është i vetmi mesazh që kam marrë dhe s’i jam përgjigjur akoma. Megjithatë për Belindin, Arlindin, Landin, për Markon dhe Lajlën uroj vetëm të mira. Mezi pres t’i kem bashkëpunëtore, jo të bëhen socialistë, por bashkëpunëtorë dhe të punojmë për ide që ata mund të kenë edhe në mënyrën se si do përfaqësohen në Këshill Bashkiak”, deklaroi Veliaj.
