TIRANE – Drejtoria e Përgjithshme e Shërbimeve të Transportit Rrugor ka pezulluar këtë të shtunë aktivitetin e 13 autoshkollave për një afat të pacaktuar ndërsa për 10 të tjera për 30 ditë. Shkak për këtë janë bërë kontrollet e kryera në muajt prill dhe maj, ku këto autoshkolla rezultuan me parregullësi.
DPSHTRR ka dërguar 3 propozime për heqje License Autoshkolle pranë QKB dhe një propozim për largim nga detyra për një Përgjegjës Sektori Leje Drejtimi. Po ashtu, është dhënë një masë e rëndë disiplinore për një Specialist Regjistrimi Mjeti, Tiranë, për shkelje në lëshimin e Lejes së Qarkullimit për një mjet Autoshkolle!
Nga 70 subjekte autoshkollë të kontrolluara në prill dhe maj, 66 prej tyre kanë rezultuar më një total prej 185 mangësish. Nga këto, sipas DPSHTRR, 53 autoshkolla korrigjuan pozicionin e tyre para ligjit brenda afateve. Nga kontrollet u konstatuan në gjendje të parregullt 68 nga 270 automjete që përdoren për guidat e kursantëve. Mangësitë kryesore të autoshkollave janë orare të pa afishuara, rregulloret e pa përditësuara, tabela keq informuese si në rastet kur një autoshkollë reklamon kategori leje drejtimi për të cilën nuk është e licencuar, regjistra teorik e praktik të pa azhurnuar, ambient jo të rregull e funksional, e më gjerë.
