TIRANË– Konferenca e kryeministrit Edi Rama me mediat këtë të mërkurë në ambientet e Këshillit të Ministrave nuk ka përfunduar pa “tension” mes tiij dhe gazetarëve të pranishëm. Shkak këtë të herë janë bërë pyetjet që Rama i cilësoi si “jashtë teme” pasi kishte dalë për të fol,ur vetëm për naftën e zbuluar nga “Shell” në malin e Shpiragut. I pyetur nga gazetarët në lidhje me aferën e sterilizmit, inceneratorët apo dhe për marrëdhëniet e tensionuara me Greqinë, Rama refuzoi të përgjigjej duke e kaluar me ironi situatën.
Edi Rama: Po mirë tani. Juve, më falni tani se ka edhe një etikë. Bëni sikur nuk kuptoni apo ca tani? Ju thashë në fillim që kjo konferencë nuk është për asgjë tjetër. Është vetëm për këtë zbulim të rëndësishëm, historik për Shqipërinë. Jemi këtu, që me ndihmën tuaj dhe me pyetjet tuaja, njerëzit të mësojnë sa më shumë nga kjo gjë. Tani, këtë mund ta bëjë një parti politike që të marrë mikrofonin dhe të fillojë… Unë nuk i shmangem asnjë pyetjeje. Deri tani nuk kam dëgjuar asnjë pyetje të re nga këto. Të gjitha janë pyetje që i jam përgjigjur 1 mijë herë. Po ju them edhe një herë. Shumë kollaj për pyetjen që keni drejtojuni zyrës së komunikimit. I japim përgjigje. S’ka asnjë problem. Sot dua të fokusohemi tek kjo gjë. Kur të kemi konferencë shtypi, i përgjigjem se nuk jam shmangur ndonjëherë. Pak etikë. Pak pak pak, minimum etik. Se kjo është sikur po bëjmë miting këtu. Merr mikrofonin, fillon prap. Muhabet kot. Nesër. Nëse pyetja nuk pret, e do sot, bëje me shkrim siç i merr përgjigjet, pavarësisht se nuk vlejnë shumë me sa kuptoj. Po të lutem mos e vazhdo më. Shpresoj shumë që kjo të mos jetë një protestë për lirinë e shtypit.
