TIRANË– Agron Çela një nga zërat e fortë opozitarë në veri, i zgjedhur deputet në radhët e Partisë së Lirisë në zgjedhjet parlamentare të 25 prillit duket se ka “tradhtuar” Ilir Metën dhe i është bashkuar Partisë Socialiste. Mësohet se ai ka pasur një darkë me kryeministrin Edi Rama, me të cilin ka rënë dakort që ai të kalojë në radhët e Grupit Parlamentar të PS-së.
Raportophet se “konfliktet” apo pakënaqësitë me Partinë e Lirisë kanë ardhur që në kohën ish-LSI-ja drejtohej nga Monika Kryemadhi. Krisja ka nisur që në djegien e mandateve, vendim i marrë nga Kryemadhi dhe Basha. Zërat për largimin e tij dolën dhe një vit më parë, pas bashkimit të Nasip Naços me PS e drejtuar nga Edi Rama, mirëpo Agron Çela i mohoi dhe tha se ato synonin të krijonin konflikte të paqena. I respektuar gjerësisht në Shkodër dhe me një mbështetje të madhe, duket se Çela dhe lidershipi i ri i PL kanë përplasje në bindjet e tyre.
Fjalët për largimin e tij qarkulluan dhe pas disa mungesave të tij në mbledhjet e Partisë së Lirisë. Mesa duket deputetin nuk e ka kënaqur dhe ardhja e Ilir Metës në krye të partisë. Ndërkohë flitet dhe për një miqësi të hershme mes tij dhe ministres së Shtetit për Marrëdhënien për Parlamentin Elisa Spiropali njëherzi dhe e deleguar në Shkodër. Një “flirt” me mazhorancën, Çela e ka pasur edhe në shkurt të këtij viti, kur në Parlament, dha votën pro ndryshimeve kushtetuese për zgjatjen e afatit të organeve të vettingut, edhe pse LSI-ja në bllok votoi abstenim.
