TIRANË– Seanca plenare e kësaj të enjteje në Kuvend vijon të zhvillohet në kushte të pazakonta. Opozita kërkon me ngulm prezencën e kryeministrit Edi Rama në Kuvend si dhe futjen në rendin e ditës të kërkesës së SPAK për arrestimin e ish-zëvendëskryeminsitrit Arben Ahmetaj. Deputetët e opozitës bllokuan foltoren duke mos lejuar kështu kreun e Komisionit Qëndror të Zgjedhjeve Ilirjan Celibashi që të flasë.
Ky i fundit nuk e lexoi raportin për zgjedhjet vendore të 14 majit. Garda e Republikës është vendosur në gatishmëri për të shmangur çdo përshkallëzim të situatës. Foltorja vijon të jetë e bllokuar. Kryetarja e Kuvendit nga ana tjetër ka refuzuar të fusë Kuvendin në një proces të paligjëm sipas saj.
Debati:
Gazment Bardhi: Ke 3 orë që ke bllokuar seancën plenare me një argument qesharak se kërkesa për rendin e ditës nuk ka objekt për ju rregullorja është paçavure. Kur ju kërkojnë gruper krimainale me urgjencë kaloni ligjin e kanabisit, për ju nuk ka rëndësi rregullorja. Për shërbimet ndaj grupeve kriminale ju nuk pyesni për rregulloren, ndërsa për Ahmetajn keni 3 orë që bllokoni Kuvendin. Seanca nuk vazhdon dot, nuk kemi nevojë për raportimin e Komisionierit, po pati ndonjë raportim për tenderat le të vijë të na e japi. Kemi paraqitur një kërkesë, hidhe në votim. Rrëzoje, se i ke votat, por hidhe në votim. Lekët e buxhetit i keni bërë si të keni lekët tuaja. Të drejtat e opozitës nuk i mohon dot as ti dhe as Edi Rama, që tani është duke bërë plazh në Dhërmi.
Lindita Nikolla: Nuk e hedh dot në votim kërkesën, nuk ka substancë. Ka 2 momente që bie ndesh. Nuk janë njoftuar deputetët me raportin, nuk është shpërndarë, është vendosur që do të mbahet të premten. Nuk është njoftuar deputeti.
