TIRANË– Gazetari Xhevahir Zhabina deklaroi në studion e emisionit “Stay Tuned” me moderatoren Valbona Mhilli se që prej kohës kur ai nisi punën si gazetar i kronikës së zezë çdo drejtor policie që vjen ka një ndër prioritetet e tij kryesore uljen e numrit të aksidenteve rrugore.
Duke vijuar më tej me shpjegimin e tij, Zhabina tha edhe rrugët e reja të ndërtuara në dekadën e fundit janë njolla të zeza për aksidentet rrugore pasi projektohen gabim.
Sipas gazetarit vetëm një strategji e koordinuar mes institucioneve të ndryshme mund ta sjellin këtë efekt.
“Në 2012 kur fillova të bëj kronikën e zezë, çdo drejtor policie që vinte një nga 4-5 prioritetet që kishte ishte ulja e numrit të aksidenteve. Dhe tani pas 12 vitesh sheh që dhe drejtori i fundit ka këtë prioritet. Aksidentet janë gjë komplekse që nuk përfshijnë vetëm policinë, përfshijnë autoritetin rrugor dhe institucione të tjera. Policia i kontrollon këto rrugë për shkak të shkeljes që mund të kryejnë qytetarët. Ti sheh dhe akset e reja të ndërtuara 10-12 vitet e fundit dhe krijohen njolla të zeza. Sapo mbarohet janë njolla të zeza pasi projektohen gabim dhe përkthehen në këto ngjarje. Institucionet duhet të marrin masat e duhura dhe të ndërtojnë si duhet. Kur nisen të ndërtohen rrugët të mbarojnë në afatin e kërkuar, të jenë të aksesueshme dhe të mos prodhohen aksidente. Ana tjetër është nga kultura që kanë qytetarët, pjesa më e madhe ndodhin për shkak të shpejtësisë së madhe dhe parakalimeve të gabuara që janë përgjegjësi të drejtuesit të mjetit. Edhe rasti i fundit ishte për shkak të shpejtësisë së madhe. Aksidentet do ndodhin, duhet një lloj strategjia që të përfshijë një sërë institucionesh që ato të mos punojnë të pavarur. Një strategji e përbashkët mund të sjellë një ulje të aksidenteve”.
