Policia e Fierit ka goditur një grup të trafikut të drogës,duke organizuar aksionin të koduar “Vakumi” , si rezultat i të cilit u sekuestruan 30 kilogramë lëndë narkotike kanabis dhe 500 gramë kokainë. Nga ky operacion dy persona u vunë në pranga, të identifikuar si Panajot Shahaj dhe Osmen Mehmetaj, ndërsa organizatori i grupit, njëkohësisht truri i grupit Eduart Mehmetaj u shpall në kërkim nga autoritetet. Pas kontrolleve në banesë gjetën 3 peshore elektronike, mjete ambalazhi, mjete që shërbenin për presimin e lëndëve narkotike etj. Për këtë arsye u bë arrestimi në flagrancë i P.Sh 43 vjeç dhe O.M, 71 vjeç, të dy banues në fshatin Cakran për prodhim dhe shitje narkotike dhe mbajtja e transportimi i substancave kimike. Lorenc Panganika, kreu i Policisë së Fierit në një deklaratë për mediat u shpreh se droga ishte e fshehur në një makinë, e ndarë në pako dhe kishte si destinacion shtetin fqinj të Greqisë.
NJOFTIMI I POLICISË:
“Është kryer kontroll në banesën e shtetasit E.M dhe në automjetin e dyshuar që do të bënte transportin e lëndës narkotike. Rezultoi që në dysheme, në hapësirën e përgatitur posaçërisht në këtë automjet u gjetën 30 kilogramë lëndë narkotike kanabis dhe 500 gramë lënë narkotike kokaine. Lënda narkotike ishte e ndarë në pako dhe e presuar me qëllim trafikimin drejt shtetit grek”
