TIRANË– Kryetari i Partisë Demokratike Sali Berisha ka hedhur akuza të forta ditën e sotme ndaj kryeministrit Edi Rama dhe vëllait të tij Olsi Rama, ministres së Jashtme Olta Xhaçka dhe bashkëshorti i saj Artan Gaçi si dhe ndaj Amant Josifit. Sipas tij ata po bëjnë presion ndaj gjyqtarëve të Gjykatës Kushtetuese në lidhje me denoncimin e bërë nga PD për shpalljen investitor strategjik të ish-deputetit Artan Gaçi njëherazi dhe bashkëshorti i ministres Xhaçka. Kreu i PD-së tha se këta veprojnë si një grup i strukturuar kriminal.
Sali Berisha: Jam sot para jush për të denoncuar me forcën më të madhe përpjekjen e rrezikshme mafioze, mobilizimin e papërmbajtur të Edi Ramës, Olsi Ramës, Amant Josifit, Artan Gaçes, Olta Xhaçkës për ndikime të shumëllojta mbi gjyqtarët e Gjykatës Kushtetuese në vendimin e tyre. Ky grup i strukturuar ka ndërmarrë dhe po ndërmerr forma antiligjore, antikushtetuese presioni ndaj anëtarëve të Gjykatës Kushtetuese me qëllim që të përligjin grabitjen përmes firmës së Edi Ramës nga Olta Xhaçka dhe bashkëshorti i saj, të statusit të investitorit strategjik me së paku 5 milionë euro favore. Kushtetuta e Shqipërisë ka qindra nene, por njëri nga këto nene, do ta quaja si nenin e artë, ai është neni që nuk lejon në mënyrë kategorike deputetët dhe ministrat, të pasurohen nga pasuritë publike gjatë periudhës që ushtrojnë detyrat apo burime të tjera përveç rrogës. Ky nen është shkelur në mënyrën më flagrante, kur ministrja Xhaçka siguron për burrin e saj strategjik, statusin e investitorit strategjik. Xhaçka kryen vepra të rënda penale, implikon kunatën e saj amerikane, me banim në Boston, si bashkëpronare në këtë aferë të tmerrshme korruptive.
