TIRANË- Ministrja e Shtetit për Mbrojtjen e Sipërmarrjes Edona Bilali i është përgjigjur ditën e sotme “flakë për flakë” kryetarit të Partisë Demokratike Sali Berisha në lidhje me akuzat për korrupsion që ai bëri ditën e djeshme ndaj saj.
Në një postim në Facebook mimistrja i ka quajtur Fake News akuzat e Berishës. Bilali shkruan se nuk ka punuar asnjë ditë të vetme në shoqërinë që Berisha pretendon se ka marrë një grant prej 50 milionë lekësh nga ministrja.
REAGIMI I EDONA BILALIT:
PËRGËNJESHTRIM: Nuk është hera e parë që mjeshtri i FAKE NEWS, deputeti Sali Berisha, shkruan diçka të rremë, thjesht tani qenka radha ime. SHKURT DHE SHQIP: Hera e parë që pozicioni im i punës ka parashikuar sekretare është ai në pozicionin e Ministrit. EDHE KËTU KAM MBAJTUR PERSONIN QË E USHTRONTE KËTË DETYRË QË NË KOHËN E PARAARDHËSIT TIM! Në shoqërinë që përmendet, NUK KAM PUNUAR ASNJËHERË! NGATËRRON (ME OSE PA QËLLIM) EMRAT E SHOQËRIVE! Rrjedhimisht, çdo gjë që thoni për personin në fjalë nuk është e vërtetë! E fundit! Kësaj skeme mbështetëse nuk ke asgjë çfarë t’i komentosh! As ti dhe as soji yt që shpifjen e kanë përditshmëri dhe kryefjalë të ditës! Përfituesit, aktorët e lidhur dhe partnerët ndërkombëtarë veçse e kanë vlerësuar dhe inkurajuar këtë skemë mbështetëse, pasi si asnjëherë më parë, ekosistemi i startup-eve s’ka qenë kaq i energjizuar sa sot, teksa mijëra të rinj e të reja kanë përfituar drejtpërdrejtë nga kjo mbështetje! More një gur dhe e hodhe padrejtësisht! Por ky gur do të kthehet tashmë si “boomerang” duke të damkosur një tjetër vulë “non grata” edhe nga rinia shqiptare!
Deklaratat dhe kundërdeklaratat kanë ardhur pas një denoncimi të bërë ditën e djeshme nga kryetari i Partisë Demokratike Sali Berisha. Berisha akuzonte ministren Edona Bilali në lidhje me ndarjen e fondave për Start-upet, në konflikt të pastër interesi. Në një postim në Facebook, Berisha ka shpërndarë një artikull të emisionit “Piranjat”, krah të cilit shkruan se ndahen fondet shtetërore mes drejtuesve të ministrisë dhe vetë ministres. Sipas tij, paratë janë ndarë mes Kamela Haskos, dy përfaqësuesve të Fondit Shqiptaro-Amerikan të Zhvillimit, Mata dhe Sarapuli si dhe Flladi Agollit, djalit të Dritan Agollit, drejtor i Fondit Shqiptar të Zhvillimit. Altin dhe Arbi Bamllarin, babë e bir, janë dy emrat e tjerë që kanë marrë 50 milionë lekë.
